Гер болһнд газ орулхин төлә

18-07-2023, 09:15 | Общество

Шидр «Негдсн Әрәсә» партин болн «Газпром газификация» ООО-н элчнр газ оруллһна социальн көтлвриг күцәлһнә төрәр Целинн района Троицкое селәнә бәәрн улсла харһв.

Әрәсән Президент Владимир Путинә даалһсар социальн газификацин көтлвр цаг-болзг угаһар күцәгдхмн, тер мет энүнд сурһуль-эрдмин болн эрүл-менд харлһна объектс бас орв.
Одахн кесн то-дигәр мана региона иргнмүдәс 1213 эрлһн орҗ ирсн болв, тер тоод 971 эрлһәр көдлмш күцәгдв, 113 болхла Целинн районд бәәдг объектс мөн, гиҗ темдглх кергтә.
«Негдсн Әрәсә» партин күцәгч комитетин һардач Байир Путеев, «Газпром газораспределение Элиста» АО-н һардач Эдуард Байрхаев, Целинн РМО-н депутат Айс Никитин, района газин цергллтин болн Троицкое селәнә муниципалитетин элчнр бәәрн улсла харһҗ соньмсулҗадг сурврмудтнь хәрү өгв.
Газ участк күртл бәәтхә гер болһна дотрнь орулгдх зөвтә. Өдгә цагт эн туст Троицкое селәнд тосхлтын көдлмш күцәгдҗәнә. Социальн көтлврт орлцхар седҗәдг улс эрлһән шулун гидгәр орулҗ кергән шунмһадулх кергтә, гиҗ Эдуард Байрхаев цәәлһвр өгв.
Байир Путеев болхла газификацин төрәр социальн дөңнлтин талдан эв-арһсин тускар бас келв. Хальмг Таңһчин Толһач Хаска Батун седвәрәр региональн дөңгин кемҗән 25 миңһн арслңгас авн 100 миңһн арслң болҗ өсв. Өрк-бүл болһна төлә эннь сән дөң-нөкд болхмн, гиҗ Байир Эдуардович темдглв.
Төрскән харсгч Алдр дәәнә ветеранмуд, тер мет цергә керг-үүлдврмүдт орлцачнр, теднә үрднь, эрмдгтә улс болн эрмдгтә бичкдүдтә, олн үртә болн баһ тетквртә өрк-бүлмүд, цааҗла харһсн улс, социальн дөңгиг авч чадҗана.
«Негдсн Әрәсә» партин приемнд, газин цергллтин болн муниципалитетмүдин мергҗлтнрәс социальн газификацин төрәр цуг тоотын тускар тодрхаһар медҗ болна. Эрлһән болхла «Газпром газораспределение Элиста» АО-н әңгүдт, МФЦ-д болн шаңһа туслмҗин порталд орулҗ өгх кергтә.

КАРСАНА Евгения

Видео