Зер-земш, темсн кедү күрнә?

20-07-2023, 09:15 | Общество

Зунын кем гүргүдән орчкв. Сүл сармудт мана таңһчд эдл-уушин үн хаврин сармудла дүңцүлхлә невчкн баһрв гиҗ келх кергтә. Хаврин эклцәр хот-хоолын, темснә болн зерземшин үн өсдгинь цуһар меднә. Тер мет үсн, махн, тосн, өдр болһн эдлдг нань чигн хотхол бас үнтәрнә.

Зунар әмтн амрлһндан һарч, теңгсин көвәд йовҗ сергмҗтәһәр цаган давулна. Герин эзн күүкд улс болхла эн кемлә болвсрсн тәрә-темс, зер-земш хураһад үвлд белднә. Эврә һарудтан урһасн эс гиҗ базрт хулдҗ авсн темс давслад шимтә хот белднә, зер-земшәс болхла әмтәхн шүүс кенә. Зер-земшин болн темснә эндрк үн медхәр шидр Элст балһсна негдгч микрорайона ца бәәдг гүртм рынкд одвидн.
Шар луувң, хавстн, боднцг, мәңгрсн – эн өдр болһн хотдан орулдг темснә үн невчкн баһрв. Энүг нурһлҗдан Әәдрхн, Волгодонск, Краснодар, Ростов-на-Дону, Нальчик балһсдас авч ирнә, эдл-уушин гүртм үн деер икәр немлго хулднавидн, гиҗ хулдач Окна Татьяна келв. Икәр үнтәрүлхлә әмтн авшго, уданар хулдгдхла тәрә-темсн ахр цагин болзгт үрнә. Терүнәс нань Цаһан Амнд, Яшкульд урһасн тәрә-темсн бас хулдгдна, талдан регионмудас авч ирсн темснә үнәс невчкн кимд болна. Үлгүрлхд, хаяр 35 арслң, адамч 65-ас авн 100 арслң күртл күрнә, боднцг – 40, хавстн – 60, шар луувң – 70, мәңгрсн – 45, әмтәхн бурш – 75, һашун бурш болхла – 150, чи – 150, шар өрг – 150, үстә үзм – 230, альмн – 80, кедмн – 280 арслң күрнә. Цаһан Амн болн Зултрһн селәдт урһасн тарвс – 30-35 арслңгар хулдгдҗана.
Балһсна ик лавксар хәләхлә, нурһлҗдан талын орн-нутгудас авч ирсн темс болн зер-земш хулдна. Тернь амтн уга, дала сән биш болдгинь цуһар меднә.
Тегәд күүкд улс базрт эдл-ууш кезә икәр кимдрхинь күләнә. Зәрмнь зер-земшиг бүкләр көргәһәд киитрүләчд хадһлад үвлдән белднә. Эннь бас чик, юңгад гихлә иим хот-хоолд цуг витамин хадһлгдна гиҗ келдгнь мел үнн.
Терүнәс нань хулдач Лиҗин Байрин келсәр, эн җилин хавр болн зунын түрүн сар серүн болад, зер-земшин болн темснә үн уданд баһрлго бәәсмн гив. Така сар мана регионд хамгин халун болдг төләд деер келгдсн эдл-уушин үн цаарандан эрк биш баһрад бәәхмн, гиҗ нәәлгднә.

КАРСАНА Евгения

Видео