Яшкулин сурһульчнр ончрв

20-07-2023, 09:25 | Общество

Москва балһснд болсн «Бәәрн залврин нүүрләчнр» Цугәрәсән марһанд Яшкулин олн салврта гимназин сурһульчнр Кирилл Цой болн Полина Романенко (зургт) 2-ч орм эзлв.

- Мана сурһулин төгсәһәч, ода Москван залврин шаңһа ик сурһулин доцент Байрта Убушаева Яшкулин олн салврта гимназин багшнрла болн сурһульчнрла хойр җилин эргцд нөкцлтҗәнә. «Бәәрн залврин нүүрләчнр» гидг марһанд сурһульчнриг орлцулҗана, тер мет мана таңһчд тиим янзта марһа бүрдәлһнд орлцв, - гиҗ гимназин һардач Светлана Делеева мана күүндвриг эклв.
Цугәрәсән марһанд одх хаалһин мөңгиг, гиичлүрт бәәх болн хот-хоолын һаруг Яшкулин РМО даав. Энүнә ахлач Бора Борисович Эдгеевд сурһулин һардач ханлтан өргҗәнә. Көлгнә һаруг эк-эцкнр даав. «Сурһульчнрла хамдан эднә багш болн номин һардач Цаһан Николаевна Хусеева йовв. Орс келнә болн утх-зокъялын багш болҗ 15 җилдән эн көдлҗәнә. Цаһан Николаевнан һардврт Кирилл Ким болн Полина Романенко таңһчин марһанд диилвр бәрлә», -гиҗ Светлана Кониевна цааранднь келв.
Цугәрәсән марһана заочн девсңд хойр миңһн күн көдлмшән илгәв. Болв цаарандк девсңд зуг 500 шинҗллт тер тоод Яшкулин сурһульчнрин төсвс, шүүҗ авгдв. Кирилл Цой мана таңһчин алдр һардач, генерал-лейтенант Басан Бадьминович Городовиковин тускар келҗ өглә. Полина Романенко болхла Яшкулин олн салврта гимназин һардач, Яшкулин района сурһуль-эрдмин әңгин һардач болҗ көдлҗәсн Елизавета Кукеновна Хаглышеван тускар бичлә.
Эн һардач эврә үүлдврин тускар хойр дегтр бичлә, терүгәр чигн күүкн һардвр келә, Яшкулин, таңһчин дегтрин саңгудт сурһульчнр көдлҗ шинҗллтән гүүдүлҗ йовла, теднд эднә һардач Цаһан Николаевна нөкд болв.
Тиигҗ эдн түрүн девсңд диилвр бәрәд, Цугәрәсән марһана ашлгч дөрлдәнд ирв. Мөчн сарин чилгчәр һурвн өдртән эдн Москвад бәәв, түрүн өдр эдн «Космос» гиичлүрт орад, орлцачнрин тоод бийән бичүлв.
Хойрдгч өдртнь марһанд орлцачнр эврә төсвән харсв. Аштнь Полина Кирилл хойр Москвад болсн Цугәрәсән марһанд уралһ кевәр орлцҗ, жюрин олн сурврт хәрү өгч, эврә шинҗллтән харсад хойрдгч орм эзлв. Асхлад арвтнрин болн теднә һардачнрин төлә Москва балһсар зуульчллһн бүрдәгдв. Көвүд-күүкд Улан талвңд, соньн талдан чигн һазрт одад, Воробьевин уул деерәс сөөһин хотл балһсиг һәәхв. Тер йовлһн Полинад болн Кириллд ик гидгәр таасгдв.
Һурвдгч өдртнь эднд марһана талдан дииләчнрин тоод Союзмудын Герин Колонна залд ачлвринь бәрүлҗ өгв. Кирилл Цой амбассадорин өөдән цол зүүв.
Одахн Кирилл Полина хойр 9-ч классин шүүврән йилһән сәәнәр өгәд, шишлң хату цаасан авв. Һаха сарин 1-д эдн шинрүлгдсн гимназьд ирҗ 10-ч класстан орх. Гимназин бәәшңд ода бат ясврин көдлмш дуусгдҗана, бәәшңгин һаза-дотакнь цугнь шинрүлгдв. 1972- ч җиләс авн бәәшңд ясвр кегдәд уга билә, тегәд энд цугнь сольгдх, шин мебель болн лабораторин кергсл орулгдх.
Яшкулин гимназин элчнр «Сила РДШ» гидг ЮФО-н марһанд диилвр бәрәд, Казань балһснд Цугәрәсән девсңд орлцх зөв авв. Энд Алтана Яшкулова спортын халхар сән белдврән үзүлв.
Домбр цокдг Мария Санджигоряева Вологда балһснд болсн Цугәрәсән «Өвкнрин авъясин зөөр эдләчнр» гидг марһанд орлцҗ мана таңһчин талдан сурһульчнрла хамдан дөрлдв.
Тиим ик марһаст мана сурһульчнр кесг кичәләр сән медрлән, билг-эрдмән, белдврән үзүлҗ ончрна. Эдниг Яшкулин гимназин багшнр урмдулҗ, дигтә-даратаһар ик марһанд белднә. Хамгин түрүнд бидн теднә медрлинь гүүдүлҗ билг-эрдминь делгрүлх зөвтәвидн, гиҗ гимназин һардач келнә.

ТҮРВӘН Һуна

Видео