Седклән медлцҗ өркән өндәлһсн медәтнр

20-07-2023, 09:50 | Общество

Дурн гиснтн басл акад юмн бәәҗ, гиҗ нег таньл эврә цагтан келснь генткн тодлгдв. Нурһлҗдан баһ насндан күн хөвән олҗ, өрк-бүлән өндәлһдг. Зәрмдән болхла ик наста улс гер-мал болдгнь хая соңсгдна. Зуг тиим йовдл учрхла олн-әмтнд өврмҗтә, бахмҗта чигн болна гидг.

Шидр Элст балһсна медәтә болн эрмдгтә улсин Гер-интернатд ончта йовдл болв. Тенд бәәдг Евгений Ботов болн Екатерина Лиджанова хойр ханьцад өрк-бүлән өндәлһв. Така сарин 8-д, өрк-бүлин, дурна болн итклин Өдрлә, нәр кев. Эн ончта керг-үүлдврт цуһар урдаснь белдсн билә. Сар хооран ЭДИПИ-н көдләчнр хойр медәтин бәрмт цаасинь Элстин ЗАГС-т илгәҗ, өрк-бүл болхар седҗәхинь медүләд эрлһинь орулв. ЗАГСин көдләчнр така сарин 8 өдриг батлад, тиигәрән ирәд, һаран тәвх кергтә гиҗ зәңглв.
Элст балһсна медәтә болн эрмдгтә улсин Гер-интернатын һардач Александр Каманджаевин келсәр, эн хойр медәт социальн бүрдәцд дөрвн шаху җилдән бәәнә. Таньлдсн түрүн өдрәсн авн үүрлдг болв. Хоюрн цаһан седклтә, тевчңгү, медәтнр дунд күндтә, тоомсрта улс болна. Келхд, эдн эн Герт гер-мал болсн дөрвдгч өрк-бүл болҗана. Евгений Владимирович болхла цугтаднь даңгин нөкд болхар шунна. Эрмдгтә, эврән йовҗ чаддго медәтнриг төгәтә сандлд суулһад, һаза һарһҗ, хамдан цевр аһар киилнә. Дәкәд болхла орнасн босдго улст хотынь авч ирнә. «Цаһан мөңгн волонтер» гиҗ энүг хоорндан цуһар дуудна.
Социальн бүрдәцд медәтә болн эрмдгтә улсин төлә цуг таал тогтагдсн бәәнә. Сарул хорас, байрин нәәрән давулдг ик зал, хотан эдлдг хора, дегтрин саң бәәнә, Гер-интернатын медәтнр өдр-сө уга дамшлтта эмчнрин хәләврт бәәнә.
Евгений нанд даңгин нөкд болҗ, бидн хамдан һаза йовҗ удандан күүнддг биләвидн. Тер саамд нег хәләцтә улс болсан медвидн, үгән олҗ өөрхнәр үүрлдг болвидн, гиҗ Екатерина Лиджанова келнә.
Насн ирәд медәрҗ йовх кемд һанцарн үлдхд эрк биш күнд болна. Зуг нег-негндән баран болад, ю-бис күүндәд, дурта кергән хамдан күцәһәд бәәтл өдр яһҗ давснь медгдхш, гиҗ медәтнр седкл санамрдсн бәәдл һарв.
Така сарин 8-лә ЭДИПИ-н көдләчнр, энд бәәдг үүрмүднь, волонтермуд хойр медәтин төлә сәәхн керг-үүлдвр давулв. Өрүн арвн часла Элстин ЗАГС-т одад, шишлң дегтрт һаран тәвсн билә. Түүнә хөөн цецгүдәр сәәхрүлсн гиигн машиһәр балһсар йовҗ, бумблвсин өөр зурган цокулв. Волонтермуд болхла эн ончта өдрин туск фильм белдхмн. Асхнднь болхла «КАН» нертә ресторанд медәтнрин төлә нәр болв.
Евгений Владимирович болн Екатерина Пантелеевна хойр иим сәәхн керг-үүлдвр бүрдәсн әмтнд ик ханлтан өргҗәнә. Бидн бас эднд эрүлменд, сән-сәәхн, хөвтә җирһл дурдҗанавидн!

КАРСАНА Евгения

Видео