Төв хурлын 108 суврһн

20-07-2023, 09:55 | Общество

Бурхн Багшин Алтн сүмин эргнд босхгдсн суврһсиг әрвсллһнә шаҗна йосрхл хурлд болв.

Хальмгин төв хурлын эргнд босхгдсн 108 суврһиг әрвсллһнә шаҗна йосрхл күцәгдв. Цуг әмтә тоотын, таңһчин әмтнә амулң мендин төлә босхгдсн суврһудын евәлд ода цугтан бәәх йовдл ик урмдта болҗана. Бурхн Багшин Алтн сүмин гелңгүд болн шаҗнд шүтдг әмтн хамцу үүлдәд эн үүлдврин күчнь цугтад күрттхә, гиҗ зальврв.
Хурлын кец-бәәдлд немр янз орулҗ кеерүлсн шаҗна суврһуд олн улсиг буйнта эн керг-үүлдврт хамцулад, шаҗна цаарандк делгрлтд туслҗана. Буйнта эн кергиг - суврһуд тосхлһна көдлмшиг йисн җилин туршарт күцәсмн. Шидр гелңгүд тосхсн суврһн болһниг шишлң ном умшҗ әрвслсмн.
108 суврһ босхлһна көдлмшиг гелңгүдин нерн деерәс зүүцүлҗ залҗах Нгаванг Лодой чинртә эн көдлмшт орлцҗах цуг әмтнд үнн седклин ханлтан медүлв.
Хальмгин төв хурлын эргндк суврһудыг әрвсллһнә чинртә үүлдвр така сарин 12-т күцәгдв. Цуг тоотнь шаҗна йосар шишлң ном умшгдҗ күцәгдв. Шаҗнд шүтдг әмтн тиим әрүн үүлдврт орлцад, буйнта керг күцәҗәнә.

УШКАНА Сувсн

Видео