Музейд хонх белглв

20-07-2023, 10:05 | Общество

Бурхн Багшин Алтн сүмд соньн нег йовдл учрв. Така сарин 14-д Москвад бәәдг нег өрк-бүл хурлд белгән нерәдв. Тернь Книгницкихнә өрк-бүл Хальмгин һазр эднд таасгдад, тиим шиидвр авсн бәәҗ. Василий Книгницкий японск сойлд ик дурта күн, тегәд нарн һарх үзгт бәәдг нутгин туск кесг соньн тоотыг эн цуглулҗ чадв. Йир байн тер зөөрәсн негинь хальмг хурлд нерәдхәр шиидәд, эн өрк-бүл Японя нег хурлас авгдсн хонх авч ирв. Бурхн Багшин номд шүтдг әмтн Японьд чигн бәәнә. Хальмгин хурлд ирәд, музейднь орсн күн болһн эн хонхиг үзҗ, шар шаҗна номин евәлд багтҗ йовтха гисн седклтәһәр Москваһас ирсн өрк-бүл белгән нерәдв.

Виктория Книгницкаян келсәр, иим хонхсиг японск шаҗна кесг хурлмудт үзҗ болхмн. Күрл мөңгнәс кегдсн эн хонх 20 һар киил татна. Эн хонхиг һазаһаснь шишлң эв-арһар цокад, мөргүл кех цаг ирснә тускар гелңгүдт зәңглҗәсмн. Дәкәд болхла тогтсн диг-дараһар хонх цокч кедү цаг болсинь медүлдг бәәсмн.
Давсн зун җилин йирдгч җилмүдт эн хонх Южно-Сахалинск балһсна эргнд олдсмн. Музейин көрңд хадһлгдҗасмн. Сахалинд тер яһҗ тусснь чигн соньн. Хан Хирохито баһ цагтан Карафуто хурлд алтн үлд, саадг, торһн эд болн күрл хонх белглснә тускар келгднә. Тер хонхд белглсн цагнь бичәтә - 1890-ч җилд хонх хурлд белглснә тускар бичгдҗәхинь умшҗ болхмн.
Хальмгин төв хурлын һардач Йонтен гелңгин келсәр, музейин тоод иим тууҗин чинртә хонх орҗ ирснь соньн. Иим кегдлмүдин дөңгәр шаҗна ном һазр болһнар яһҗ делгрҗ йовхинь медҗ, нааран ирсн әмтнд цәәлһҗ болхмн.

УШКАНА Сувсн

Видео