Хальмг театрт Пушкинә наадн

20-07-2023, 10:10 | Общество

Басңга Баатрин нертә Келн-улсин драматическ театрт «Русалка» шин наадн үзүлгдв. Газетд урднь бичсәр, А. Пушкинә эн наадыг Китдин нутгас Әрәсәд ирҗ ик сурһуль сурсн режиссер Ланьбо Цзяо белдҗ тәвсмн.

Наадна сценографиг Мария Шуплецова күцәсмн. Баһ наста эн хойр эрдмч сценическ билг-эрдмин Әрәсән шаңһа күрәлң төгсәсмн. Эврәннь наадндан баһчуд дурнас ахлдгнь һазр деер угаг медүлҗ чадснь соньн гих кергтә. Олн зүсн ухан-тоолвр орулҗадг наадыг әмтн оньган өгч хәләв.
Наадыг түрүн болҗ үзүлсн саамд «Сцена будущего» гидг төсвин шинҗләчнр Ольга Егошина болн Ксения Стольная орлцҗ, эврә тоолврарн хувалцад, наадн эн тәәз деер тәвгдснь эврә чинртә болсинь темдглв. Таңһчин сойлын болн зуульчллһна министрин селвгч Герман Санджарыков министерствин нерн деерәс наад белдҗ тәвсн режиссерт болн зурачд Ханлтын бичгүд бәрүлҗ өгв. «Сцена будушего» гидг төсвин кемҗәнд күцәгдсн наадн Хальмг театрт тәвгдсн йовдлыг үнләд, Герман Эрдниевич театрин коллективд ханлтан медүләд, ах режиссер Манҗин Борисиг Чувашин шаңһа мөрә авснлань йөрәв.
Театрин һардач Галина Шураева иим хамцу үүдәгч көдлмш шин урмд өгдгин тускар келв. «Сцена будушего» гидг төсвин йовудт Басңга Баатрин нертә Келн-улсин драматическ театрт Александр Пушкинә «Русалка» наадн тәвгдв.

ҖИРҺЛИН Кермн

Видео