Суңһвр өөрдҗ йовна

22-07-2023, 09:30 | Общество

Таңһчин Улсин Хуралд (Парламентд) намртан болх суңһвр өөрдҗ йовна. Энүнд ямаран белдврин көдлмш кегдснә тускар шидр болсн брифингин йовудт келгдв.

Така сарин 10-д суңһврт орлцх улсас бәрмт цаас авлһна кем төгсв: долан парть бәрмт цаасан күццднь авч ирв. Тедн дунд «Негдсн Әрәсә», «КПРФ», «ЛДПР», «СПРАВЕДЛИВАЯ РОССИЯ – ПАТРИОТЫ – ЗА ПРАВДУ», «ПАРТИЯ РОСТА», «РОССИЙСКАЯ ПАРТИЯ СВОБОДЫ И СПРАВЕДЛИВОСТИ» болн «НОВЫЕ ЛЮДИ» мөн.
Таңһчин Олна палатын ахлач Мучан Батрин келсәр, парть болһнла эдн бооца батлхмн. Эн җил суңһврт нег мандатта округудар нег чигн күн кандидат болҗ бийән заасн уга. Суңһвр болх өдрт баһчуд суңһврин участкудт бүрткәчнрәр көдлҗ чадхмн, гиҗ Батыр Иванович цәәлһв.
Келхд, кесг кандидатнр суңһврт орлцдг зөвән геев, тер юңгад гихлә бәрмт цаасан цаг-болзгтнь авч ирсн уга.
Б.Б.Городовиковин нертә Хальмг ик сурһулин заллтын болн зөвин дацңгин һардач Виктория Ромадикован темдглсәр, суңһвриг бүртклһнә төлә шинҗләчнрин баг бүрдәгдсн билә, эдн нег сара хонгин туршарт көдләд зөв эвдсн йовдлмуд илдксн уга гив.
Намртан болх суңһвр дигтә-даратаһар давхин төлә бидн цуг таал тогтаҗанавидн, эннь мана һол керг, гиҗ Олна палатын ахлачин дарук Раим Файзиев келв. Тер мет суңһврин йовуд видеод бичгдхмн, терүгинь бас белдҗәх болв.
Өдгә цагт суңһврт орлцх бүрткәчнр шишлң сурһуль сурчана. Энүнә йовудт цуг кергтә тоотла таньлдҗ, дассн медрлән намртан көдлмштән олзлҗ чадхмн, гиҗ «Калмыкия» РИА-н һардач Хоңһр Марилов зәңглв.

КАРСАНА Евгения

Видео