Бат ясвр күцәгдҗәнә

22-07-2023, 09:45 | Общество

Ода сурһульчнр зуни амрлһнд һарсн цагт таңһчин сурһульмудт бат ясврин көдлмш күцәгдҗәнә. Цуг гермүд һаха сарин 1 күртл эдлврт орулгдх зөвтә. Эн көдлмшт таңһчин һардвр һол оньган өгчәнә. Дарук җилд бат ясвр декәд 50 сурһульд бас күцәгдх гиҗ таңһчин Толһач Хаска Бату олнд медүллә.

Одахн эн туст ямаран көдлмш кегдҗәхин тускар соньмсҗ таңһчин сурһуль-эрдмин болн номин министр Булһн Ангирова Яшкулин района сурһульмудыг бүрткв. Энд Утта селәнә сурһульд болн Е. К. Хаглышеван нертә олн салврта гимназьд бат ясвр күцәгдҗәнә. Эднә гермүд сән йовудтаһар шинрүлгдҗәнә.
Төв Яшкуль болн Утта поселкудт министр тосхлтын компаньсин элчнрлә, бат ясврин аһу ик көдлмш күцәҗәх тосхлтын бүрдәцслә күүндвр кеҗ, көдлмшин йовудыг бүрткв.
Хойр сурһулин гермүдт ширдлһнә-шалдлһна көдлмш дуусгдсн бәәнә, инженерн сүлҗән эдлврт орулгдҗана, терз-үүдн сольгдв, герин орань шинрүлгдҗәнә. Эндр объектс ик зуудан белн бәәнә. Дарук сурһулин җил эклтл цуг көдлмш төгсх зөвтә. Цугнь сән чинртәһәр болн цаглань күцәгдҗ, сурһульмудын болн района ирлцңгү залврин һардачнр бүртклһән чаңһах зөвтә гиҗ Булһн Борисовна темдглв. Министерствин көдләчнр чигн эн объектст һол оньган өгәд бәәхмн.
Элстин лицейд, 4-ч болн 15-ч тойгта (Аршан поселк) сурһульмудт бас бат ясвр күцәгдҗәнә. Эн көдлмшиг балһсна һардврин толһач Шафран Тепшинов болн тосхлтын салврар бәәдг түүнә дарук Виктор Джанжиев давсн нарн өдрлә бүртксн билә. Эн объектс бас сурһулин җил эклтл эдлврт орулгдх зөвтә.

ҖААХАН Бадм

Видео