Китдин арһлачнрла харһв

22-07-2023, 09:50 | Общество

Хальмг ик сурһуль кесг орн-нутгудын вузмудла батлсн нөкцлтән җил ирвәс өргҗүләд йовна. Тер тоод Китд орн-нутгин ик сурһульмудт орс келнә төвмүд бүрдәгдлә, тенд хальмг вузин багшнр ирҗ орс кел дасхна, тер мет китд багшнр Элстүр ирҗ Хальмг ик сурһульд китд келәр сурһна. Тернь ик кемҗәтә нөкцлтин темдг болҗана. Аштнь тер хамцу көдлмш делгрәд йовна.

Одахн чигн хальмг вузд Китд орн-нутгин олн зүсн халхар бизнес күцәдг бүрдәцсин 10 элч ирв. Эднд селәнә эдл-ахун дацңгин магистратурин көтлвр, Хальмг ик сурһульд һазадын орна кесг оютнр сурдгнь эднд бас таасгдв. Энд дасхдг өдгә цагин кесг эрдмәр чигн эдн соньмсв.
Эврә орн-нутгтан хәрҗ ирхләрн эдн мана Хальмг ик сурһулин тускар олнд медүлхәр седҗәнә. Эднә делегацин нег гешүн селәнә эдл-ахун дацңгин магистрин көтлврт орхар седәд, бәрмт цаасан орулҗ өгв. Сочи балһсна ик сурһульд зуульчллһна эрдм дасв. Эднә компаньсин элчнр кесг вузд одад ямаран эрдм дасхдгинь шинҗлв.
Хальмг оютнр болхла теднә компаньст дамшлт авч чадҗана, түүнә тускар эдн хальмг вузла бооца батлв. Тернь ик туста. Яһад гихлә Китд орн-нутгт ода кесг шин технологий өргнәр олзлҗана, тер тоод программированя болн өдгә цагин нань чигн салврин халхар ик дамшлт хоршасн бәәнә. Тегәд хальмг оютнр тер туст медрлән гүүдүлхлә сән болхнь лавта.

ҖААХАН Бадм

Видео