«HAGRIN» нүүдл улсин наадмд орлцв

22-07-2023, 10:10 | Общество

«HAGRIN» гидг нертә хальмг баг Бурятьд болсн көгҗмин ик керг-үүлдврт орлцв.

Хальмгин этно-электропанк «Hagrin» гидг баг этно-электроникин көгҗмәрн темдгтә. Шидр эн баг, така сарин 14-15-д, Бурятьд болсн «Нүүдл улсин дун» гидг көгҗмин нарт-делкән наадмд орлцв. Соньн наадмд олн орн-нутгас көгҗмчнр цуглрв.
Наадмд Кореин, Китдин, Казахстана болн Әрәсән 150 һар көгҗмч энд билг-эрдмән үзүлв. Көгҗмин олн-зүсн янзар 40 һар концерт соңсҗ-үзх таал Бурятин хәләһәчнрт болн нааран ирсн улст учрв. Этно-рок, инди - көгҗм, бурятск рэп болн нань чигн тоотыг концертст ирсн әмтн медҗ авв.
«Эн өдгә цага көгҗмин халхар болдг хамгин чинртә наадм болҗана, - гиҗ «Hagrin» багд орлцач, таңһчд әмтн сән меддг көгҗмч Руслан Дуляев келнә. – Олн һазрас көгҗмчнр ирнә. Дәкәд болхла эн көгҗм кесг һазрар яһҗ делгрҗәхинь үзхд наадмин көтлвр цуг таал тогтав».
Улан-Удэ күртл эн баг Сиврин балһсдар йовҗ концертсән үзүлв. Келхәс, Екатеринбург, Омск, Новосибирск, Томск болн Красноярск балһсдар йовҗ, «Hagrin» концертсән тәвв. Альднь болв чигн хальмг багин көгҗм тааслт олв. Соньн көгҗмчнрлә таньлдҗ, үүдәгч нөкцлтин тускар эдн күүндв. Иркутск балһсна хәләһәчнриг өдгә цага хальмг көгҗмлә таньлдулсна дару «Hagrin» баг Бурятин наадмд орлцв.
Өдгә цагт «Hagrin» намрин цагт ямаран һазрар йовҗ, хальмг этническ көгҗмлә әмтиг таньлдулхан зуралҗана.

ҖИРҺЛИН Кермн

Видео