Зака эвдснь засглгдв

25-07-2023, 09:10 | Общество

Кредитын баһ кемҗәтә бүрдәцин туст бүтәгдсн кергәр таңһчин приставмудын болн Элст балһсна зарһин һарһсн шиидвриг Хальмг Таңһчин Деед зарһ дөңнв.

Элст балһснд бәәдг 19-тә болн 22- та баһ наста хойр күн иим бүрдәцд мөңг авад, цаг-болзгтнь өрән даңцаҗ чадсн уга. Эн бүрдәцин көдләчнр зака эвдәд, өрән даңцатн гиһәд хойр көвүг әәлһҗәдг шүрүн үгмүд бичәд телефоһар илгәсн бәәҗ.
Таңһчин УФССП-н мергҗлт бүтәгдсн административн кергин йовудт ирлцнгү бүрдәцин туст хойр керг бүтәгдәд, 50-әд миңһн арслң ялд уңһагдв.
Эн җилин зурһан сарин то-дигәр, кредитын баһ кемҗәтә бүрдәцсин болн компаньсин туст арвн дөрвн ирлцңгү керг бүтәгдв. Ут тоодан тедн 700 миңһн арслңга ялд уңһагдв, гиҗ таңһчин УФССП-н барин цергллт зәңглв.
Ирлцңгү йовдл учрхла таңһчин иргнмүд приставмудт шишлң бичг бичҗ, эс гиҗ Элст балһсна, Герасименкон нертә уульнцд бәәдг, 61-ч тойгта герин хайгар ирҗ, эврәннь сурврмудан өгч чадҗана. Терүнәс нань 3-85-11, 3-88-86 тойгудар җиңнүлҗ болн r08. fssp.gov.ru сайтд бичҗ болна.

ОЛЬДАН Цаһан

Видео