Бийән эмнүлҗ амрхмн

27-07-2023, 09:25 | Общество

Хальмг Таңһчар үүлддг Әрәсән социальн саңгин әңг эн җилд санаторн эмнлһ авх улсин төлә 415 путевк хулдҗ авв. Җилин түрүн зурһан сард 151 күн орн-нутгин санаторьмудт одҗ эмнлһ авсмн.

Федеральн шишлң тоод орсн улс иим социальн дөң, тер мет санаторьт йовад эмнлһ авч чадҗана. Зуг социальн дөңгин мөңг авдг улст иим зөв уга, гиҗ таңһчин Социальн саңгин әңгин һардач Юлия Ургадулова келв.
Санаторьт путевк хулдҗ авхларн СФР-ин мергҗлтнр иргнмүдин эрүл-мендинь шинҗлҗ, ямаран гемәр гемтҗәхинь учртан авна. Кабардино-Балкарин, Анапа, Геленджик болн Кисловодск балһсдын санаторьмудт мана таңһчин улс сән чинртә эмнлһ авна.
Темдглхд, санаторьт одх путевкс чеерүдин диг-дараһар өггднә. Чеерүдт бичгдснә тускар СФР-ин сайтд орад эврәннь СНИЛС-ин тойгар цәәлһвр авч болна. Тенд барлгдҗадг зәңг даңгин шинрүлгднә.

ОЛЬДАН Цаһан

Видео