Камбоджа нутгт одв

29-07-2023, 09:35 | Общество

Бурхн Багшин Алтн сүмин һардач Йонтен гелң Әрәсән Олна палатд келн-улсин болн шаҗна хоорндк хәрлцәнә төрәр үүлддг комиссин ахлач болдмн. Эн өдрмүдт Йонтен гелң Камбоджа нутгт көдлмшин халхар одв.

Тер орн-нутгин Келн-улсин ассамблейин парламентск нег партин орлцлһн ямаран кевәр давҗахинь шинҗлҗ бүртклһнә көдлмшт Йонтен гелң орлцҗана. Әрәсән делегацин ханьд бүртклһнә көдлмшиг эн күцәҗәнә.
Олна палатын гешүн болад, Йонтен гелң хойрдад Камбоджа нутгур йовҗана. Камбоджур эн өдрмүдт суңһврин көдлмшт орлцхар 65 орн-нутгас элчнр ирсмн. Чинртә иим үүлдврт Йонтен гелң урднь чигн орлцҗ йовла. Давсн җилд Непалд энүнә күцәсн көдлмшинь Әрәсән Олна палатд сән халхаснь темдглсмн. Улсин хоорндк төсвд орлцҗахнь Йонтен гелңгин олна үүлдврин дамшлтынь өөдлүлҗәнә.

ҖААХАН Бадм

Видео