«Номин күрдин дүүцң»

29-07-2023, 10:05 | Общество

Шар шаҗнд шүтдг әмтнд хәәртә нег өдр бәәнә. Тернь Бурхн Багш түрүн болҗ сурһульчнртан номин цәәлһвр өгсн өдр. Тернь эн җил така сарин 21-д ирлцҗ темдглгдв.

«Номин күрдин дүүцң» - гиҗ нерәдгдсн өдр гегәрлтин хаалһд орснаннь хөөн Бурхн Багшин Гегән түрүн сурһульчнртан түрүн номин цәәлһвр өгсн өдр болҗ темдглгднә. Эн ик евәлтә йовдл 2500 җил хооран болсмн. Саяд әмтнд хөв-кишгин хаалһ сексн номин күчн ода күртл әмтнд урмд өгч йовна.
Эн өдр олн-әмтн Төв хурлд ирҗ «Мәәдрин эргц» гидг авъяс болсн үүлдврт орлцҗ, Мәәдр гегәнә көшә залҗ зальврад, хурлыг эргҗ йовв. Эн өдр кегдсн байрин шишлң мөргүл цуг әмтә тоотд, зурһан зүүл әмтнд хөв-кишг заях урмдтаһар кегдв.
Хойр миңһн дундур җил хооран иим ном үүдсинь, Бурхн Багшин Гегән делкән олн-әмтнд хөв-кишгин хаалһ заасн номан сурһульчнртан цәәлһҗ медүлсинь медхд чигн ик евәлтә болна. Ода делкәд саяд улс эн номд шүтҗ, терүнә күмни сә хәәгч чинртнь багтҗ йовна. Хальмгин һазрас кесг миңһн күн Бурхн Багш номан хәәрлсн һазрт күрч, Бодгаяд тер әрүн модна өөр мөргүл кеснь чигн эн өдр тодлгдна.
Түрүн сурһульчнртан ном цәәлһәд, эн номин евәлд күртсн түрүн гелңгүд тиигхд тедн болсмн. Тер цагас авн эдн эн номиг олн дунд цәәлһдг болсмн. Тиигәд делкәд түрүн болҗ ямаран чигн чидләс деерлкдгнь ухана күчн болдмн гиҗ зарлсн Бурхн Багшин Гегәнә номин гүн учр-утхнь чинрән геелго, мана җирһлд түшг болҗ йовна.
Ом мани падме хум.

УШКАНА Сувсн

Видео