Хальмгин Шаҗн-Ламла харһв

01-08-2023, 09:00 | Общество

Бадм цецгин наадм эклхин өмн Хальмг Таңһчин Толһач Хаска Бату болн Хальмгин Шаҗн Лам Муутл гевш харһҗ күүндв. Бадм цецгин наадмин йовудт бурхн-шаҗна әрүн тоотын һәәхүл үзүлгдхин тускар күүндвр болв.

«Әрүн чинртә тоот, үлгүрнь, Бодхи модна ац – Бурхн шаҗнд шүтдг улсин төлә йир хәәртә болдмн, - гиҗ таңһчин Толһач һәәхүлин чинрин тускар келв. - Эн һәәхүлд хамгин хәәртә гиснь – шарира – Бурхн Багшин әрүн цогцин евәлтә умш болхмн. Бурхн-щаҗна эн әрүн тоот Элстүр Шри-Ланкас авч ирсмн. Бурхн Багш гегәрлтин хаалһд орсн моднас ацин бүчр авч ирҗ, терүнәс урһагдсн модн чигн олн улсин оньгт тусхагдҗана». Тер әрүн умшин күчнь йир ик гиҗ тоолгдна. Терүг үзсн күн дарук һурвн җирһлдән хөвтә-кишгтә болх гисн тоолврин тускар Муутл гевш келв.
Тиигәд бурхн-шаҗнд шүтдг әмтнд шаҗна сәәхн цецгән байрт орлцхларн таңһчин тууҗла, сойлла, шаҗнла таньлдх арһ учрхмн. Шаҗна әрүн тоотыг һәәхҗ, Бурхн Багштан зальврад, седкл төвкнүн бәәхмн.
Лаганьд болх Бадм цецгин наадмд орлцтн гиҗ Хальмгин Шаҗн Ламд болн цуг улст таңһчин Толһач үрвр кев.

УШКАНА Сувсн

Видео