Эврә кергән бүтәв

08-08-2023, 09:25 | Общество

Сүл һурвн җилин эргцд мана орн-нутгт социальн бооца батллһна керг сән делгрлт авчана. Җирһлин күнд таалд туссн улст эврә керг бүтәхд, дөңцл эдл-аху секхд, өрк-бүлиннь теҗәл икдүлхд шаңһас дөң күрггднә. Мана таңһчин әмтн бас социальн бооца батлҗ, олзта-орутаһар үүлдҗәхнь темдгтә. Кесгнь эврә кергән делгрүлҗ күцәмҗтәһәр үүлддг болад шин көдлмшч орм бүрдәнә. Дәкәд эдн бәәрн бюджетд алвна мөңгән орулҗахнь бас ик чинр зүүнә. Социальн бооца батлсн улс нурһлҗ баһчуд болна, тегәд шаңһа дөң эднд көл деерән һарч батрхд ик урмд өгнә.

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, эн җил 572 социальн бооцан батлгдхмн гиҗ зуралгдҗана. Эн җилин түрүн зурһан сарин эргцд 315 күн социальн бооца батлв, эднд шаңһас 58 сай асрлң йилһгдв. Социальн бооца батлсн улс дунд 144 күн эврә керг бүтәв, 47 күн мал хулдҗ авад дөңцл эдл-аху делгрүлҗәнә, 77 күн эрдмәрн көдлмш олҗ авв. Эн җил эврә керг бүрдәлһнд 350 миңһн арслң, дөңцл эдл-аху бүрдәлһнд 200 миңһн арслң йилһҗәнә. Тер мет көдлмш олҗ авхд 59,5 миңһн арслң болн җирһлин күнд бәәдләс һархд 89,3 миңһн арслң өгнә. Эврә керг бүрдәхәс урд эдн ямаран халхар үүлдснь орута болхиг шинҗлнә, әмтнд ямаран туслмҗ күргснь олзта болн туста болхиг медҗ авна. Кесгнь бичкндк цагасн авн санҗ йовсн санаһан күцәҗ тааста керг бүрдәнә.
(полную версию статьи можно посмотреть в бумажной версии выпуска № 83 (18922) 8 августа 2023 года, ВТОРНИК)

ДООҖАН Наталья
ЗУРГТ: социальн бооца батлсн Басңга Җаңһр уйн наста спортсменлә кичәл давулҗах кем

Видео