Өвкнриннь заңшал хадһлҗ

17-08-2023, 09:25 | Общество

Эн хаврар «Җилин сән гисн өрк-бүл» гидг Әрәсән марһана региональн девсңгин аш диглгдҗ, салвр болһнд дииләчнр йилһгдсн билә. Өвкнриннь авъяс хадһлҗ, хальмг улсин заңшалар болн авг-бәрцәр бәәдг, дорас өсч йовх баһ үйд терүг медүлҗәдг өрк-бүлмүд дунд Көтчнрә района Ергенинский селәнд бәәдг Виктор болн Замира Манджиевихнә өрк-бүл диилвр бәрсмн.

Эдн өсәд-боссн төрскн селәндән бәәнә, отг-әәмгтән күндтә улст тоолгдна. Виктор Санджиевич болн Замира Николаевна хөрн шаху җилдән хамдан бәәнә, эдн һурвн үрндән чик сурһмҗ өгч, хальмг улсин авъясар бәәсәрн байн, суусарн өнр бәәдг улс болна. Герин эзн малан асрад, өрк-бүлән теҗәнә. Сурһулян төгсәснә болн әәрмәс бууҗ ирснә дару эн эдл-ахуд олн җилдән малд көдлв. Авальнь болхла герин чимг болҗ, ээҗнь заасн сурһмҗар күүкдән хәләҗ, медсән теднд зааҗ, залудан ицлтә түшг болна. Алтына болн Баина күүкднь, Бата көвүнь тааста эрдм шүүҗ авад, дунд шишлң болн деед сурһуль сурчана.
- Мини ээҗ Эльзята Хактаевна Болдырева бичкндк цагасм авн хальмг улсин авъяс зааҗ, келн-улсин сән өдрмүдиг яһҗ тосдгиг, күүкн күн бийән яһҗ бәрдгиг дасхв. Ээҗән дахад, би Цаһан Сарин, Зулын байрин өдрмүдт күцәдг авъясиг медҗ авлав. Хәрд һарсн цагт мини хадм эк болн эцк уга билә, тегәд өрк-бүлдән цугинь хальмг авъясар кеһәд, күүкдтән чигн чик сурһмҗ өгхәр шундг биләв. Бидн гертән төрскн келәрн күүндҗ, күн болһн өвкнриннь тууҗ, сойл медх зөвтә гиҗ күүкдтән заанавидн. Келн-улсин авъяс-заңшал хадһлдг өрк-бүлмүд дунд болсн номинацд диилвр бәрснь маднд ик бахмҗ үүдәв. Таньл-үзл, нег һазра улс мана байр хувалцҗ, диилвр бәрснлә йөрәв. Көтчнрә районас хойр өрк-бүл дииләчнрин тоод орад, бичкн төрскнәннь нер һарһв. Мана күүкд өсәд-босад, эврә өрк-бүлтә болхларн бас хальмг авъясар бәәҗ, медсән-дассан хадһлхнь лавта, – гиҗ Замира Николаевна толҗана.
Хойр күүкнь болн көвүнь сәәхн хальмг келиг экиннь уургла шиңгәҗ авсмн. Алтына Т.Хахлынован нертә медицинск колледжд сурчасн цагтан оютнрин ансамблин ханьд кесг марһаст болн фестивальмудт орлцсмн. Ода эн Әәдрхн балһснд эмчин эрдм дасчана, институтд ямр нег байрин керг-үүлдвр болхла хальмг би биилҗ чадна. Бата селәнә сурһульд сурчасн цагтан бас билг-эрдмән үзүлҗ, йөрәл тәвҗ, шунмһа кевәр үүлдҗ йовла. Ода эн Элстд Политихническ колледжд сурчана, иргчдән эн көлгн-күч ясдг эрдмтә болхмн. Көвүн олн зүсн көлг ясад, ямр нег кемтг учрхла зииһинь соляд эвдрсн техникиг дарунь чиклдг урта. Эн бичкнәсн авн бөдүн улсиг дахад, ямаран көлгиг яһҗ ясхиг дасч авв. Экнь келсәр, аавнь тиим һартан өөтә, олн зүсн техник ясхдан эвтә бәәсмн. Баина күүкн Б.Городовиковин нертә ик сурһульд сурчана, эн һазрин болн өр-зөөрин хәрлцәнә мергҗлт болхмн. Күүкднь өсәд-босад, оютнр болад сурһуль сурч йовна. Ямр нег сән өдрин байрла герүрн хәрҗ ирхләрн эдн хальмг авъясар цә-боорцг белдҗ, зулан өргҗ, ах үйин улсиг тоохдан дурта.
Эднә өөр йирн зурһата ээҗ Алена Бамбышевна Лиджиева бәәнә. Медәт зун насндан күрч йовдг болв чигн заглюн, серглң ухата, домбр цокна. Манҗин Замира ээҗлә хальмг келәр күүндҗ, чееҗән сергәхдән дурта. Медәтә күүнлә күүндхлә, ухани сергҗм гиҗ кезәңк үлгүрт келгддгәр, Алена Бамбышевнан тодлврмуд соңсхла, домбрин айст авлгдхла, күүнә седкл байрар дүүрнә. Экнь медәтә күүг тевчҗ насинь күндлҗ сән өдрмүдин байрла ямр нег белгән авч одхла, күүкднь терүг тодлҗ авна. Тиигәд, эврәннь авг-бәрцәрн экнь күүкдтән үлгүр болҗ, сурһмҗ өгнә.
- Ода мана күүкд оютнр болад, Элстд болн Әәдрхнд бәәнә. Эн марһанд белдвр кехин төлә эдн хәрҗ ирәд, хойр-һурвн өдртән гертән бәәв. Бидн мана өрк-бүлин тускар медүлхин төлә видео цокҗ белдвидн, нань чигн даалһврмуд күцәввидн. Эннь мадниг улм батрулҗ, хамцулв, тегәд диилвр бәрсн йовдл ик байр-бахмҗ үүдәв. Өвкнриннь авъясар бәәҗ, мана аавээҗнр батлсн авг-бәрциг хадһлҗ, хальмгин нериг өөдән бәрҗ йовх кергтә. Бидн авальтаһан хөрн шаху җилдән ниитә бәәнәвидн, мана күүкд өлзәтә сән үрд болҗ өсв. Хальмг улсин авъяс-заңшалар бәәҗ, төрскн келән хадһлҗ йовхнь мана өрк-бүлиг батрулв, – гиҗ олн үртә Манджиевихн тоолврарн хувалцв.

ДООҖАН Наталья
ЗУРГТ: хальмг улсин авъяс хадһлҗадг Манджиевихнә өрк-бүл

Видео