Төрскнч седклтә улсиг өскхәр

17-08-2023, 09:40 | Общество

Баһчуд – мана иргч гиҗ келдг. Зуг өдгә цагт баһчуд ниигмин хамгин седвәртә болн шунмһа әңгнь болҗахинь бас темдглх кергтә. Ямр чигн орн-нутгин экономическ болн политическ халхсиг баһчуд дөңнҗ, төрскн һазриннь делгрлтд тусан күргҗ йовхнь лавта.

Мана таңһчд болхла баһчуд номин, билг-эрдмин, спортын болн талдан чигн халхар көдлмшән бүрдәхин төлә цуг таал тогтагдсн бәәнә. Эн туст Баһ Дөрвд селәнд «Бамб цецг» нертә баһчудын төв кесг җилдән күцәмҗтәһәр үүлдҗ йовна.
Шидр төвин һардач Өлзәт Хасыковала харһҗ күүндвидн. Энүнә келсәр, төв 2014-ч җиләс авн көдлнә. Түрүн һардачнрин тоод Лидия Цадаева, Марина Полякова болн Евгения Очаныкова йовла. Мел эдн төвиг эклцәснь авн һардҗ, көдлмшинь сән кевәр бүрдәв. Би болхла һардачар 2021-ч җиләс авн көдлҗәнәв, гиҗ Өлзәт Мутуловна келв.
Түрүн өдрәс авн чадмһа һардач көдлмшән эврә һартан авсмн. 2021-ч җилд «Бамб цецг» төв Хальмг Таңһчин баһчудын Төвлә (РЦМ) нөкцлтин бооца батлсн болдг. Тер җилд пандемийәс көлтә амр биш цаг болсинь цуһар меднә. Гертәсн һарч чаддго медәтнрт, эрмдгтә улст болн олн үртә экнрт олн-әмтнлә хамдан чадсарн дөңгән күргвидн. Өдр болһн тежәлдән орулдг хот-хол, кергтә эм хулдҗ авад, теднд гертнь күргдг билә. Эн буйнч седклин керг-үүлдврт волонтермуд олар орлцв. Тер цагин тускар нег һазра улснь даңгин ханлттаһар тодлна.
Тер мет төвин баһчуд таңһчин, района болн селәнә чинртә керг-үүлдврт даңгин шунмһаһар орлцсиг темдглх кергтә. Диилврин Өдр, бар сарин 28 – Санлын өдр, баһчудын болн төрскнч седклин олн зүсн акцс болн талдан керг-үүлдврмүд эднә орлцлт угаһар давхш. Терүнәс нань төвд тренажерн хора бәәнә.
Онц темдглхәс, өдгә амр биш цагт төвд нег һазра улс хурад, цергә шишлң керг-үүлдврт орлцачнрин төлә дөң белдәд илгәнә. Тер мет хальчлдг гөлм гүрлһнд ик-бичкн уга орлцҗана, гиҗ Өлзәт Хасыкова темдглв.
Удл уга «Бамб цецг» төвин ул деер «Движение первых» Цугәрәсән җисәнә девсң эклхмн. Нааран района сурһулин бүрдәцсин элчнр ирҗ хамцу үүлдврән күцәҗ чадх. Келхәс, төв района бүрдәцслә бат залһлда бәрҗ, олн керг-үүлдврән хамдан давулна.
Эндр болхла «Бамб цецг» төвд шулун-шудрмг, төрскнч седклтә улс көдлнә. Тедн дорас өсч йовх баһчудт сән медрл, чик сурһмҗ өглһнд туслна. Тер мет ах үйин улсиг күндлҗ, теднәс үлгүр болн байн дамшлт авхар шунна.

КАРСАНА Евгения

Видео