Хальмгин шаҗна үүлдәчнр нарт-делкән чуулһнд

17-08-2023, 09:50 | Общество

Бурхн-шаҗна төрәр нарт-делкән чуулһн Бурятьд болхмн гиҗ бидн урднь зәңглләвидн. Эн ик цуглран ноха сарин 17-с авн 19 күртл болхмн. «Традиционный буддизм и вызовы современности» гиҗ нерәдгдсн эн форумд Хальмгин шаҗна үүлдәчнр орлцҗана.

Өдгә цагт бурхн-шаҗна делгрлт ямаран кевәр делгрҗәхин туск чинртә төрмүдәр болх эн ик хургт Хальмгин Шаҗн лам гевш Тендзин Чойдак, Хальмгин төв хурлын демч Йонтен гелң орлцҗана, номтнр болн дааврта мергҗлтнр.
Чуулһна бүрдәһәчнр – Бурятин шаҗна хувргудын ниицән, Бурятин Залвр, Будда шаҗна сурһуль-эрдмиг болн шинҗллтиг дөңнгч саң. Росконгресс саң эн чинртә форумиг дөңнснь бас үзмҗтә гих кергтә. Форумин көдлмшт 13 орн-нутгин элчнр орлцҗана. Китдин, Энткгин, Моңһлын болн нань чигн орн-нутгудын шаҗна үүлдәчнр, номтнр өдгә цагт буддизм улсин җирһлд ямаран орм эзлҗәхин тускар тоолврарн болн шинҗллтәрн хувалцхмн.
Энткгин, Шри-Ланкан, Таиландын күцц зөвтә элчнр, Китдин болн Моңһлын Бурхн шаҗна ик сурһульмудын ректормуд орлцхнь чуулһна чинринь улм икдүлҗәнә. Шаолинск хурлын гелңгүд, кесг орн-нутгин олна, номин болн шаҗна бүрдәцсин элчнр эн көдлмшт орлцҗана.
Бурхн Багшин шаҗна ном өдгә цагт ямаран кевәр делгрлт авчахин тускар тохнята күүндвр кегдҗ, олна җирһлд, гүн номин туст, сойлд шаҗна нилч ямаран болҗахинь медүлгч шинҗллтс келһнә төрмүд форумд темдглгдҗ авгдхмн.

УШКАНА Сувсн

Видео