Медәтнрт нөкднр кергтә

19-08-2023, 09:35 | Общество

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, 65 нас һарсн медәтнрт болн гемтә-шалтгта улст туслмҗ күргҗ дөң болх нөкднрәр көдлх саната улс керглгдҗәнә. Эдниг түрүләд сурһад хөөннь таңһчин әмтнә социальн теткврин комплексн төвд көдлмшт авхмн.

Нөкднр медәтнрт болн гемтә-шалтгта улст цаглань дөң күргҗ, хотынь өгх, бийинь уһах, хувцлх, әәмшг уга болн сән таал тогталһиг теткх зөвтә болхмн. Бийән асрҗ чаддго, өөрхн улснь олн зүсн учрар тедниг хәләдг арһ уга болхла нөкднр өдртнь ирҗ кергтә туслмҗ күргдг болхмн. Өр-өвч седклтә, тесвртә, ах үйин болн эрдмгтә улст килмҗән тусхаҗ дөң болх санан бәәхлә, шишлң сурһуль сурад «асрлһна нөкд» гидг шин эрдмәр көдлҗ болҗана. Келхд, сурһулиг өңгәр «Демографь» гидг келн-улсин төсвәр давна. Медәтнрин болн эрмдгтә улсин нөкднр сард 27 миңһн арслңга җалв авхмн.

Мана зәңгч

Видео