Шар шаҗна хургин ашнь диглҗ

22-08-2023, 09:00 | Общество

Хальмг Таңһчин Толһач Хаска Бату, таңһчин Шаҗн Лам Тензин Чойдак болн Б.Б.Городовиковин нертә Хальмг ик сурһулин һардач Салан Бадм Улан-Уде балһснд болсн шар шаҗна нарт-делкән түрүн хургт орлцв.

Бату Сергеевичин келсәр, Бурятин Республикд ирснь темдгтә, тернь юңгад гихлә, 2014- ч җилд эн эцктәһән Иволгинск дацанд ирсн билә. Тиигхд Хамбо ламин келсәр, шар шаҗнд шүтдг күн нарт-делкәд яхар ирсән медх зөвтә. Күн болһн медрл авч, энүгән җирһлин йовудт олзлх зөвтә гисмн. Ямр чигн күцәсн кергәс хамгин сәәнинь тодлх кергтә гиҗ келсн бәәҗ. Эн үгмүдинь бийдән тодлҗ авлав, гиҗ Хаска Бату темдглв. Тер мет региона Толһач «Феномен XII Пандито Хамбо Ламы Даши Доржи Итигэлов» нертә селвлцәнд орлцв.
Онц темдглхд, Бату Сергеевич Бурять Республикин толһач Алексей Цыденовла харһҗ олн төрмүдәр күүндв. Бурятуд болн хальмгуд олн җилдән ахнр-дүүнр болгч улс болна, өдгә амр биш цагт эдн Төрскән харслһнд түрүн зергләнд йовхинь онц темдглх кергтә.
Мана хойр регион делгрәд йовна. Зөрсндән күрх санатаһар көдләд, орн-нутгин цецгәрлтин төлә тәвцән орулҗ йовхвидн, иим аһу чинртә керг-үүлдвр шар шаҗнд шүтдг делкән улсиг эрк биш негдүлв, гиҗ Хаска Бату ашлв.

ОЛЬДАН Цаһан

Видео