ӨӨРДИН НААДМ ҮЗМҖТӘ БОЛВ

24-08-2023, 09:50 | Общество

Тогтсн авъясар эн җилин ноха сарин 4-5-д Моңһл Улсин Увс әәмгин Түргн сумна «Онцын тасрха» зуульчллһна бүрдәцин улд «Ойрад Түмэн» гидг үндсни байр наадм давулгдв. Эннь эрин һурвн наадмас (мөрнә урлдан, нум-сум харвлһн, бөк бәрлдән), болн билг-эрдмин нааднас тогтна. Эн наадмиг 2013-ч җиләс авн арһлач Жалав Батсүк экләд, җил болһн давулҗана.

Эн җилин өөрд үндсниф байр-наадм маш соньн болҗ медгдв. Юңгад гихлә эн «Наадмин» эклцин концертд цуг өөрд-моңһл келтнрин байн сойлыг тодрха кевәр үзүлсмн. Тедү мет Увс әәмгин «Өөрд» театрин артистнр, Тэс, Түргн, Сагил, Тариалан сумна билгтнр ирәд, дуд дуулад, өөрд эрдмлә цуг гиичнриг таньлдулв. Җил болһн Наадмд Хальмг Таңһчин билгтнр бас орлцна. Эн җил наадмд «Эрктн» ансамблин һардач Ланцана Татьяна, Бурлака Наталья, нертә келмрч, дууч, Сарпан дунд сурһулин һардач Шорван Феликс болн мана һазра нань чигн улс орлцв.
Тиигәд бидн хол болв чигн эврә һазртан бәәдг болв чигн, сойларн хувалцад, нег-негндән соньн болҗ бәәнәвидн. Мадна, хальмг улсин сойл теднд өвәрц болҗ медгднә, теднә сойл болхла мадниг бас соньмсулна. Өлгәдән бәәсн маднд нег-негән мартх зөв уга, тиигәд цааранднь чигн нег-негндән байр үүдәҗ бәәхлә маш сән болх!
«Ойрад Түмэн» гидг үндсни байрин наадм җил болһн Алта уулын белчрт давулгдна. Тегәд эн наадмд орлцх седкл бәәхлә күн болһн орлцҗ чадҗана. Ирх күсл бәәхлә, Иҗлин усн чальчаг, гисн үлгүрәр хол һазр гиҗ тооллго, мана өвкнрин һазрт күрәд үзх кергтә гиҗ санҗанавидн.

МАНҖИН Намру

Видео