Шунмһа баһчудла харһв

26-08-2023, 09:00 | Общество

Хальмг Таңһчин Толһач Хаска Бату «Әрәсә олн эв-арһта орн-нутг» көтлврин «Әрәсән нүүрләчнр» региональн марһанд орлцачнрла харһв.

Эн марһан мана таңһчд түрүн болҗ давулгдҗана. Һурвн зун күүнәс зурһань ончрв. Тедн дунд Эсен Азыдов, Байрмир Пожаров, Игорь Ремишевский, Гилән Шургучиева, Араша Болаев болн Бадм Довунов мөн. Келхд, эн зурһан күүнәс зәрмнь урдк җилмүдт марһанд орлцсн билә.
Баһчуд таңһчд инвестиц оруллһна туст үүдәсн төсвән олна оньгт тусхав. Регионд селәнә эдл-ахуд, зуульчллһнд, нефтин болн газин хәәврт онц оньг өггдҗәхиг баһчуд темдглв. Терүнәс нань эдн Москван болн талдан балһсдт мана нег һазра көвүдкүүкд алс-зәәһин эв-арһар көдлҗ чаддг седвәр орулв.
Тер мет таңһчин Толһач Хаска Бату Элстд һаха сарин 15-д туст болх экономическ хургт орлцхин эн баһчудт үрвр кев. Хург эклтл таңһчин то-дигин делгрлтин министр Алексей Этеевд эднлә хамдан төсвин йовудт көдлмшч кесг шин ормс бүрдәх даалһвр өггдв.
Соньн харһлт «Негдсн Әрәсә» партин штабд болв. Региональн девсңгин дииләчнрт цааранднь күцәмҗ дурдҗанав, гиҗ Бату Сергеевич ашлв.

ОЛЬДАН Цаһан

Видео