Усар тетклһнә төр хаһлгдх

29-08-2023, 09:00 | Общество

- Хальмг Таңһчин улсиг цевр усар тетклһнә төрт таңһчин болн орн-нутгин һардвр һол оньган тусхаҗана. Эн җил таңһч «Цевр усн» гидг федеральн төсвин медлд уудг усар тетклһнә объектс тосхлһна болн яслһна кергт немр мөңг авхмн. Әрәсән Залврин Ахлач Михаил Мишустин ирлцңгү тогтавр батлв. Әрәсән Федерацин Залвр мана регионд ик оньган тусхаҗахд ик ханлтан өргҗәнәв. Кех-күцәх көдлмш дала, – гиҗ таңһчин Толһач Хаска Бату зәңглв.

Эн җил орн-нутгин зәрм субъектс «Цевр усн» гидг федеральн төсвин медлд уудг усар тетклһнә объектс тосхлһнд немр мөңг авхмн. Ут тоодан 11 регионд эн чинртә төр хаһллһнд 843 сай арслң йилһгдҗәнә. Шаңһа мөңгн усар тетклһнә бүрдәцс шинрүллһнд болн «Цевр усн» гидг федеральн төсвин керг-үүлдврмүд шунмһадуллһнд туслхмн. Эн төсвин һол күслнь – 2024-ч җил күртл Әрәсән әмтнә 88,8 процентиг уудг усар тетклһн мөн. Эн төсвин керг-үүлдврмүд күцәлһнд федеральн бюджетд 2023 җилд 46,6 җува арслң, 2024-ч җилд болхла 26,8 җува арслң батлгдсн бәәнә.

ДООҖАН Наталья

Видео