Уйн наста цергчнрин күцәмҗ

29-08-2023, 09:05 | Общество

Хальмгин «Барс» гидг команд «Зарница 2.0» цергә-спортивн нааднд диилвр бәрв. Эдн «Прорыв» гидг стратегическ цергә сурһулин наадн» гидг номинацд ончрв. Хальмг Таңһчин Толһач Хаска Бату күүкд-көвүдиг диилвр бәрснләнь йөрәв.

Волгоградск мүҗд Гуля Королеван нертә лагерин улд «Баатрмудын цаг» гидг цергә-спортивн селгән болв. Терүнә чилчәр эн марһана ашлгч девсң болв, диилвр бәрхин төлә Аһшин мүҗин, Луганск Улсин Республикин болн Хальмг Таңһчин командс марһлдв. ЛНР-ин Антрацитовск районас 130 күүкн-көвүн эн лагерьт амрсмн.

Цергә-спортивн селгәнд амрсн күүкд-көвүд арһ-чидлән болн эв-дован үзүләд, шав авсн улст түрүн дөң күрглһнә, залһлдаһар тетклһнә болн бууһар халһна даалһврмуд күцәв. Эн җил түрүн болҗ нисәч угаһар нисдг эв-арһар заллһна марһан болв.

- Баһчуд мана орн-нутгин иргч, эднә төрскнч сурһмҗд ик оньг тусхагдҗана. «Нүүрләчнрин җисән» «Медрл» гидг Әрәсән ниицәнә дөңгәр эн цергә-спортивн наад сергәҗ давулснд байрлҗанав. Марһана бүрдәһәчнрт, тер тоод «Дәәч» гидг цергә-спортивн белдврин болн баһчудт төрскнч сурһмҗ өглһнә Төвин һардач Чимид Джангаевд ханлтан өргҗәнәв. Иим керг-үүлдврмүд дорас өсч йовх үйд чик сурһмҗ өглһнд туслна. Һаха сард мана «Барс» команд Нижний Новгород балһснд болх «Зарница 2.0» Цугәрәсән марһанд орлцх. Бәрсн күцәмҗән делгрүлҗ шин диилвр бәрхиг дурдҗанав, – гиҗ Бату Сергеевич баһчудыг йөрәв.

ДООҖАН Наталья

Видео