Ончта өөн угтҗ

29-08-2023, 09:20 | Общество

Эн җилин намрар Әрәсән МВД-н участкудын дааврта көдләчнрин цергллт 100 җилин өөнән темдглхмн. Ноха сарин 23-д ончта өөн угтад, Хальмг Таңһчар болн Әәдрхнә мүҗд үүлддг Әрәсән УМВД-н әңгүдин көдләчнр төрскнч акцд орлцв.

Яшкулин района Хулхт поселкд эн җил өөнән темдглҗәдг цергллтин туг хальмг полицин көдләчнрт бәрүлҗ өггдв.
Әәдрхнә мүҗин УУПиПДН УМВД-н үүлдвриг бүрдәдг Заллтын һардач, полицин полковник Николай Омельченко керг-үүлдвриг секв. Николай Николаевич хальмг полицин элч, полковник Санл Шамаковд туг бәрүлҗ, орн-нутгин регионмудын полицин көдләчнр хоорндан нөкцлтҗ, көдлмшин халхар ямр чигн кергүдәр нег-негндән дөң-тусан күргҗ йовх зөвтә гиҗ темдглв.
Тер мет Хальмг Таңһчин МВД-н диг-дара тогталһиг харслһна һардачин дарук Санл Шамаковин темдглсәр, бәрүлсн туг ведомствд ончта орман эзлҗ, хөөннь цааранднь өгүлгдхмн. Терүнәс нань Санл Николаевич хам-хоша бәәдг хойр регион хоорндан кесгәс нааран нөкцлтҗ, иньгллтин хәрлцә бәрҗ йовна гив.
Керг-үүлдврт Әәдрхн балһсна сойлын колледжин оютнр орлцҗ, билг-эрдмән үзүлв. Гиичнр хальмг улан зандн цәәһәр болн әмтәхн боорцгар тоогдв.
Түүнә хөөн кесг өдр давад, мана таңһчин болн Сарпулин крайин меҗә деер туг Сарпулин крайин МВД-н элч, полковник Владимир Севостьяновд бәрүлҗ өггдв.
Темдглхәс, иим акц Әрәсән МВД түрүн болҗ давулҗана. Участкудын көдләчнрин цергллтин туг орн-нутгин регион болһнд өгүлгдәд, үкр сард Москва балһснд ирх зөвтә.
Участкудын көдләчнрин цергллтин көдлмшиг өөдлүлхин болн баахн мергҗлтнриг төрскнч акцст орлцулхин төлә иим керг-үүлдврмүд давулгдна.

КАРСАНА Евгения

Видео