Чинртә күүндвр болв

31-08-2023, 09:00 | Общество

Хальмг Таңһчин Толһач Хаска Бату Әрәсән тосхлтын министр Ирек Файзуллинлә харһад, «Цевр усн» гидг федеральн төсвин керг-үүлдврмүд күцәлһнә, меклгдсн улсин төлә гермүд тосхлһна болн региона тосхлтын халхиг делгрүллһнә төрмүдәр күүндв.

Харһлтд хамгин түрүнд мана таңһчд «Цевр усн» гидг федеральн төсвин керг-үүлдврмүд күцәлһнә төр босхгдв. Хальмг Таңһчд ода усар тетклһнә 6 объект тосхгдҗана. Хотл Элст балһсна әмтиг уудг усар тетклһнә төр бас күүндврт хәләгдв.
Тер мет таңһчин селәдт болн балһсдт әмтнә төлә сән кец-таал тогталһна тускар күүндвидн, гиҗ Хаска Бату темдглв. «Балһснд сән кец-таал тогталһн» гидг шаңһа төсвин медлд 2023-ч җилд мана таңһчд шин 12 парк секгдхмн. Зәрм объектст ясврин көдлмш төгсв, әмтн амрхин төлә сән таал тогтагдсн бәәнә.
- Әрәсән тосхлтын министерств мана таңһчд күцәҗәх көтлврмүдин негнь әмтнә гер-бүүрин таал ясруллһн болна. Росстатын то-дигәр, эн җилин түрүн зурһан сарин эргцд мана таңһчд 62 миңһн дөрвлҗн метр аһута гер-бүүр эдлврт орулгдв. Давсн җилин ашар гер-бүүр эдлврт оруллһна кемҗәһәр Элст Әрәсән балһсдын дунд 17-ч орм эзлв. Хотл балһснд 102 миңһн дөрвлҗн метр аһута гер эдлврт орулгдв. Терүнәс нань мөңгән орулад меклгдсн таңһчин әмтнә зөв харслһна саңгудын дөңгәр Элстин 9-ч микрорайонд кесгтән зогсчасн герин тосхлт төгсв. Әрәсән тосхлтын министерствд болн Ирек Энваровичд ик ханлтан өргҗәнәв, - гиҗ Бату Сергеевич келв.

ДООҖАН Наталья

Видео