Әмтнә җирһл ясрулхин төлә

02-09-2023, 09:05 | Общество

Шидр Хальмг Таңһчин Толһач Хаска Бату «Негдсн Әрәсә» партин төв күцәгч комитетин һардач, генеральн хүүвин сегләтрин дарук Александр Сидякинә һардврт болсн селвлцәнд орлцв.

- «Негдсн Әрәсә» партин Улсин көтлврин медлд мана таңһчд сүл җилмүдт аһу ик көдлмш күцәгдв. Тиигәд, ут тоодан 100 һар социальн объект шинрүлгдҗ тосхгдв, эннь сурһульмуд, бичкдүдин садмуд, эмнлһс болн ФАП-муд, спортивн тосхлтс, селәнә сойлын Гермүд, медәтнрин болн гемтә-шалтгта улсин бүрдәцс мөн. Дәкәд партин седвәрәр селәдт поштын әңгүдт ясврин көдлмш кегдҗәнә. Давсн җилд хойр әңгд ясвр кегдв, эн җил болхла дәкәд 17 әңгд сән таал тогтах арһ учрв. «Әәмшг уга хаалһс» гидг партин төсвин медлд мана таңһчд зун дууна хаалһ тосхгдв. Хотл балһснд 4 хаалһ эдлврт орулгдв, дәкәд 7 уульнцд ясврин көдлмш төгсв. «Шин сурһуль» гидг төсвин медлд нидн 17 сурһулин бүрдәцин бәәриг шинрүлвидн. Эн җил таңһчин 24 сурһульд бат ясвр төгсчәнә. Ирх җилд 30 һар сурһульд бас ясвр кехәр зуралҗанавидн. Эн көтлврәр сурһульмудын бәәрин бат ясвр кесн деерән материальн-техническ улынь батрулҗана. Тиигәд, спортивн болн байрин керг-үүлдврмүд давулдг залмуд, хот уудг болн хот кедг хорас шинрүлгдв. Эннь сурһульмуд өдгә цага некврлә ирлцхд туслхмн, – гиҗ Бату Сергеевич темдглв.
Эн җил «Негдсн Әрәсә» партин олна дөңнлтин региональн штаб секгдв. Эн шин закана болн олна седвәрин тускар ухан-тоолврарн хувалцхин төлә харһлтс, волонтерск керг-үүлдврмүд давуллһна орм болв. Таңһчин Толһачин келсәр, региональн штаб Әрәсән сән гисн һурвн штабин тоод орна.
- Мана нег һазра улсин җирһлин таал ясруллһнд дөң болҗ иим арһ өгчәх төләднь Әрәсән Президент Владимир Путинд болн «Негдсн Әрәсә» партьд ханлтан өргҗәнәв! – гиҗ Хаска Бату келв.

БАТАН Наталья

Видео