«Динамо» 100 җилин өөнән темдглв

02-09-2023, 09:10 | Общество

«Ни-негнд болн көгҗлтд – мана күчн» («Сила в движении и единстве») гисн үгмүд «Динамо» спортивн ниицәнә дуудвр болна. Шидр олна бүрдәц 100 җилин өөнән темдглв. Таңһчин Толһач Хаска Бату эднә байрин хургт орлцад, спорт делгрүллһнд ик тәвцән орулсн улсин ач-тус темдглҗ ачлвр бәрүлҗ өгв.

- Би спортын халхар эврәннь үүлдврән Москвад «Динамод» эклләв. Карате киокушинкайин болн боксин халхар мергҗлтән өөдлүлҗ, хамцу командын ханьд һурвн дәкҗ Москва балһсна ГУВД-н чемпиона нер зүүләв. Эн спортивн ниицәнә ветеранмудыг, нертә спортсменмүдиг медҗ таньдгарн бахмҗ кенәв, эдн мини үүрмүд болна. «Динамо» энтн зуг спорт биш, энтн залу-зөрмг, чидлтә, арһта болн өмәрән зүткдг улсин өрк-бүл мөн. Дәкәд хамгин һоллгчнь – «динамовцнр» төрскн һазртан эңкр улс болна, – гиҗ Бату Сергеевич келв.
Хальмгт «Динамо» спортивн җисән делгрлт авчахиг таңһчин Толһач темдгләд, олна ниицәнә Хальмг Таңһчин әңгин ахлач Игорь Юшковд ханлтан өргв. «Ода шин спортивн объектс тосхгдҗана, олн зүсн спорт делгрлт авчана. Таңһчин спортын министерствд Хальмгт «Динамо» ниицәнә гешүдин то икдүлх даалһвр өгүв, хамгин түрүнд бичкдүд терүнд орх зөвтә. Бат эрүл-менд болн иргч үүлдвртнь диилвр дурдҗанав», – гиҗ таңһчин Толһач йөрәлин үгдән темдглв.

БАТАН Наталья

Видео