Сталинградск бәрлдән диилвриг өөрдхв

30-09-2023, 12:07 | Общество

Шидр мана таңһчур Аһшас күндтә гиичнр ирәд, Сталинградск бәрлдәнә 80 җилин өөнд нерәдгдсн керг-үүлдврт орлцв. Делегациг Аһшин мүҗин Хүүвин Ахлач Александр Блошкин һардҗ ирв. Делегацин ханьд Төрскән харсгч Алдр дәәнд орлцач Александр Васильевич Медков, контртеррористическ керг-үүлдврмүдин болн СВО-н ветеранмуд орв, цуһар эдн «Аһшин офицермүд» гидг олна бүрдәцин гешүд болна.

Хальмг Таңһчин Улсин Хуралын (Парламентин) Ахлачин дарук, КПРФ-ин Хальмг региональн әңгин комитетин негдгч сегләтр Нуура Николай болн депутат Артем Михайлов гиичнрлә хамдан Мөңк һалд цецгүд тәвәд, әмнәсн хаһцсн салдсмудын санл тевчв. Бичкдүдин үүдәлтин бәәшңд болсн харһлтын өмн цуһар дәәнә ветеранмуд Александр Медковиг болн Петр Леонтьевиг бүләнәр тосад, бат эрүл-менд дурдв.
Аһшин мүҗин губернатор, Әрәсән Баатр Андрей Бочаровин нерн деерәс региональн ветеранмудын олна бүрдәц ахлҗадг Александр Блошкин харһлтд орлцачнрт йөрәлин үг келв. Күндтә гиичин келсәр, «Сталинградск бәрлдән Төрскән харсачнрин шин үйин залу-зөрмгин ул» гидг төрскнч седклтә төсв эн җил хөн сард Әәдрхнд эклв. Аһшин мүҗин ветеранмудын хүүв эн керг-үүлдвриг сойлын седвәрин президентск саңгин дөңгәр Сталинградск бәрлдәнә 80 җилин өөнин җилд давулҗана.
- Хальмг Таңһч Сталинградск бәрлдәнд эврә тәвцән орулв. Таңһчин әмтн арһ-чидлән агсҗ көдлҗ, цугинь фронтд йовулҗ, танкс болн самолетмуд тосхлһнд демән орулсн билә. Әмтн хот-хол, хувц, мөрд болн цергчнрт кергтә нань чигн тоот йовулсмн. Хальмгин әмтн Сталинградск фронтыг тосн-түләһәр, бу-селмәр, хот-хоолар тетксн Әәдрхн-Кизләр хоорндк төмр хаалһ тосхв. Сталинградск бәрлдәнд орлцсн Улан Әәрмин әңгүдт хальмг улс залу-зөрмг кевәр церглҗ йовла. Олн келн-улс төрскн һазран сулдххин төлә ааһ-цусан асхҗ дәәлдҗ йовсиг бидн мартх зөв угавидн. Теднә санлыг мөңкрүлх зөвтәвидн, - гиҗ Александр Блошкин темдглв.
Аһшин мүҗин зака үүдәгч бүрдәцин Ахлач Төрскән харсгч Алдр дәәнә ветеран Петр Леонтьевд болн шишлң цергә керг-үүлдврт орлцачнрт белг бәрүлҗ өгв. Хургт хам-хоша бәәдг хойр региона ветеранмудын олна бүрдәцсин үүлдврин, нөкцлтин тускар күүндвр болв. Тер мет эдн хоорндан дамшлтарн хувалцҗ, чинртә төрмүдәр ухан-тоолвран медүлв. Харһлтын чилгчәр Аһш, Урюпинск, Камышин балһсдын болн Аһшин мүҗин талдан райодас ирсн үүдәгч коллективсин хамцу концерт болв.

БАТАН Сәәхлә
ЗУРГТ: Мөңк һалд цецгүд тәвҗәх кем

Видео