Үвлд эртәснь белдҗ

30-09-2023, 12:10 | Общество

Намр гүргүдән орчксн бәәнә, өдр ирвәс теңгрин бәәдл сольгдад йовна. Нарта өдрмүдиг серүн өдрмүд сольна. Өрүн болһн зөвәр серүн болна, зәрмдән салькн чигн көдлнә. Өдртнь болхла нарн халулад мадниг байрлулна. Удл уга мана таңһчд дулаһар тетклһнә кем эклхмн, эн туст белдврин көдлмш эртәснь давулгдҗана.

Әрәсән регионмудт дулаһар тетклһнә кем, һаха сарин 1-әс авн хулһн сарин 15 күртл, эн цагин болзгт эклнә. Эн кем кезә эклхин туст балһсн болһна муниципальн һардвр эврән шиидвр авна. Аһарин кемҗән учртан авгдҗ дула өглһнә өдр батлгдна. Тавн өдрин туршарт аһарин кемҗән 8 градусас дор орхла, муниципальн һардвр олн давхрта гермүдиг дулаһар экләд теткнә.
Элстд олн давхр гермүдт бәәдг әмтн дулаһар тетклһнә кем кезә эклхинь күләнә. Келхәс, хамгин түрүнд социальн болн сурһуль-эрдмин бүрдәцс, эннь бичкдүдин садмуд, дунд сурһульмуд, эмнлһс дулаһар теткгднә.
«Энергосервис» АО-н һардачин үүлиг цаг зуур дааҗадг Владимир Лакшиновин келсәр, Элстд бәәдг хөрн долан котельн 87 процентд үвлд белн бәәнә. Котельнсин тооһас 82 процентд ясвр күцәгдв. Эвдрсн кергсл, дула өглһнә сүлҗән болн нань чигн тоот ясгдв.
Темдглхәс, 1-ч, 6-ч микрорайодын болн Б.Б.Городовиковин нертә Хальмг ик сурһулин котельнст бат ясвр күцәгдәд, ТВГ болн КВА хәәсд, Пионерская, Ю.Клыковин нертә уульнцст болн П.Жемчуевин нертә таңһчин эмнлһнә котельнст бас ус кедг шишлң хәәсн болн талдан шин кергсл углҗ тәвгдв. Терүнәс нань зәрм участкудт усна, электрокүчнә сүлҗән бас ясгдсн билә.
Дулаһар тетклһнә кемд белдәд, ут тоодан 36 сай арслң һарһгдв, гиҗ Владимир Китяевич зәңглв. Энүнә келсәр, җил болһн цуг котельнсиг Элстин һардврин орлцлһтаһар шишлң комиссь хәләҗ бүрткнә. Эн җил цуг котельнс цаг-болзгтан ясгдад, үвлин кемд белн бәәнә, гиҗ комиссь шиидвр һарһв.
Намрин-үвлин кемд Элст балһсна 27 котельн көдлмшән эклхдән белн болчкв. Тенд көдлдг мергҗлтнр өдр-сө уга күцәх көдлмштән орхар белдҗәнә. Һаза ик киитн уга болхла дулаһар тетклһнә кем тогтсн авъясар хулһн сарин 15-д эклхмн, гиҗ Владимир Лакшинов темдглв.

КАРСАНА Евгения

Видео