Хаалһс ясгдҗана

05-10-2023, 09:05 | Общество

Хальмг Таңһчин Толһач Хаска Бату хаалһин шаңһа агентствин һардач Роман Новиковла харһв. Мана регионд чинртә хаалһс тосхлһн харһлтын һол төрнь болв.

– Эн җил «Сән чинртә, әәмшг уга хаалһс» келн-улсин төсвин йовудт 160 дууна хаалһс болн 8 тагт ясгдхмн. Эн туст шаңһа хазнас 1,33 тербум арслң йилһгдв. Өдгә цагт Элстд Шапшукован болн Шахматная нертә хойр уульнцд 2 дууна хаалһс ясгдв. Тер мет региональн чинртә дөрвн бәәрнд 32 һар дууна хаалһст ясврин көдлмш күцәгдв, тер тоод Яшкуль-Комсомольский, Баһ Дөрвд-Ик Царң, Городовиковск-Тахта, Комсомольский-Артезиан хаалһс орв. Иргч хойр долан хонгт дәкәд 42 дууна хаалһст дөрвн бәәрн ясгдхмн, гиҗ Бату Сергеевич темдглв.
Шаңһа хаалһст бас онц оньган тусханавидн. Эннь дөрвн татасар хувагдад ясгдхмн. Тиигхлә хаалһст зеткртә йовдл учрдгнь эрк биш баһрулгдхмн. Элст-Яшкуль хоорндк хаалһиг бас ясвидн. Элстәс Улан Эрг күртл дөрвн татаста хаалһ кегдх гиҗ зуралгдҗана. Цуг эн тоот 2024-2025 җилмүдин зурад орхмн, гиҗ Хаска Бату иткүлв.
Хаалһс ясгдад, экономик делгрүллһнд тусан эрк биш күргхмн. Тәвгдсн зурас күцәгдәд, көдлмшч шин ормс чигн бүрдәгдәд бәәхнь лавта.
Хаалһин шаңһа агентств мана таңһчд оньган тусхаһад дөңнҗәснд ханлтан өргҗәнәв. Сән чинртә хаалһс цааранднь ясгдхмн, гиҗ Бату Сергеевич иткүлв.

ОЛЬДАН Цаһан

Видео