Нег һазра улсин даавр иткүлхәр

12-10-2023, 09:00 | Общество

Артем МИХАЙЛОВ, Хальмг Таңһчин Улсин Хуралын (Парламентин) Ахлач:
- Хальмг Таңһчин Толһач болн доладгч хуралтын депутатнр нанд таңһчин Улсин Хуралын Ахлачин үүл даалһв. Энтн ик даавр. Ода бидн цуг арһ-чидлән хамцулад, күцәгч йосна органмудла хамдан үүлдҗ, нег һазра улсин бәәдл-җирһл ясрулхин, мана таңһч чидлтә болн арһта болхин төлә цугинь кех зөвтәвидн. Эн чинртә керг күцәлһнд маднд федеральн йосна органмудын таңһчд үүлддг әңгүдин, олна бүрдәцсин элчнр, ачта медәтнр болн баһчудын дөңгән күргх гиҗ ицҗәнәв.
Таңһчин Улсин Хурал улсин болн залврин органмудын иткл делгрүллһнә, бат залһлда батруллһна төв болх зөвтә. Мана суңһачнрин даалһврмуд мартх зөв уга маднд. Мана көдлмш чикәр болн дигтә-даратаһар бүрдәгдснәс таңһчин делгрлтин туст күцәмҗ бәрхд туслхнь лавта. Түрүн сессь бүрдәмҗтәһәр давв, цааранднь тиим кевәр көдлмшән бас давулхвидн. Таңһчин министерствсла болн ведомствсла хамдан төрмүдиг түрүләд комитетмудын сүүрт хәләһәд, ухан-тоолврарн хувалцсна хөөн сессьт шиидвр батлҗ авхвидн. Ода деерән хуралын аппаратд депутатын туск заканд сольвр оруллһна туст закана төсв белдх даалһвр өгв. Терүнәс иштә депутатнрҗил болһн суңһачнртан тооцаһан өгдг болхмн. Дәкәд комитетмүдин то икдүллһнә туск закана төсв бас белдхвидн. Доладгч хуралтын депутатнрин үүлдвр күцәмҗтә болхиг дурдҗанав.

Валерий ОЧИРОВ, Советск Союзин болн Хальмгин Баатр, таңһчин Улсин Хуралын депутат:
- Доладгч хуралтын депутатнр үүлдврән эклв. Түрүн сессь күцәмҗтә болв. Сүүрт таңһчин залврин гешүд Хальмг Таңһчин Толһач Хаска Батун һардврт орлцв. Давсн цагин тускар ухаллго, болсн йовдлмудыг учртан авлго партьс болн олн әмтн күчән негдүлҗ таңһчин делгрлтин төлә хамцу үүлдх кергтә гиҗ эндрк хургт келгдв. Бидн мана таңһчин әмтнә җирһл ясрулҗ, экономикин һол халхиг – селәнә эдл-ахуг делгрүлҗ авх зөвтәвидн. Олн әмтн маднд иткәд депутатд суңһҗ авв, теднә итклиг болн даавриг бидн күцәх зөвтә болҗанавидн.

Очр ХАЛГАЕВ, таңһчин Улсин Хуралын бюджетин, экономическ политикин, арһлачнрин комитетин ахлач:
- Эн җил таңһчин Хуралын депутатнр шин эв-арһар суңһгдв, энтн тууҗлгч чинртә йовдл болҗана. Ода Хальмгин район болһнд, мана балһсна булң болһнд таңһчин Улсин Хуралд эврә депутат бәәнә. Суңһврин өмн әмтнлә харһсн кемд эдн 35 миңһн даалһвр өгв. Энтн мана суңһачнр маднд өгсн даавр болна.Иргн болһн суңһврт орлцад маднд дууһан өгсн цагт тиим кевәр даалһвран өгв. Таңһчин бюджет батлсн цагтан бидн мана әмтн өгсн даалһврмүдыг болн босхсн төрмүдиг учртан авхвидн.

БАТАН Сәәхлә

Видео