ЛНР-ин бичкдүдт белг белдв
Хальмг Таңһч болн Луганск Улсин Республикин Антрацитовск район хоорнд нөкцлтин бооцан батлгдсн бәәнә. Терүнә медлд мана таңһч ЛНР-ин әмтнд эрүл-менд харлһна, сурһуль-эрдмин, тосхлтын халхар дөң күргҗәнә. Күн болһн эн кергт орлцҗ, Антрацитовск района улст демән күргҗ чадҗана гиҗ Сарпан района әмтнә социальн теткврин комплексн төвин көдләчнр нег һазра улст дуудвр кев.
Мана района өр-өвч седклтә улс ЛНР-ин Антрацитовск района бичкдүдин төлә белг белдсн бәәнә. Бәәрн улс бичкдүдин төлә сурһульднь кергтә эд-тавр, хувц-хунр белдв. Бидн нег һазра улст, арһлачнрт зүркни ханлтан өргҗ, эднә цаһан седкләсн белдсн белгүд Луганск Улсин Республикин күүкд-көвүтд ик байр үүдәх гиҗ санҗанавидн. Эндрк амр биш цагла хамгин түрүнд бичкдүдт мана килмҗ кергтә, - гиҗ района КЦСОН-а һардач Татьяна Рубежанская келнә.
БАТАН Сәәхлә