Әмтнә зөв харсхар

14-10-2023, 09:00 | Общество

Хальмг Таңһчин прокуратурт коррупцас болн тосхлтд мөңгән орулад гермүд тосхлһна халхд зөв-йос эвдлһнәс саглуллһна көдлмшч багин сүүр болв. Таңһчин прокурор Виталий Семенченкон һардврт болсн сүүрт Хальмг Таңһчин залврин Ахлач Босхмҗин Гилән орлцв. Таңһчд тосхлтд мөңгән орулад меклгдсн улсин зөв харслһна, эн нәрн төр хаһллһна туст хамцу үүлдхин зура батллһна тускар харһлтд орлцачнр күүндв.

Эндр өдр мана таңһчд тосхлтыг эс төгсәсн хойр олн патьрта гер негдсн реестрт бәәнә, эднь балһсна 5-ч микрорайонд бәәнә. «Фонд развития территорий» гидг компаньд заагдсн гермүдин тосхлтд мөңгән орулсн улсин зөв харслһна туск эрлһ орулгдв. Эднә зөв харсхин төлә саң эднә һару даңцалһнд мөңг йилһхмн. Эн кергт 22,29 сай арслң кергтә, таңһч әмтнә зөв харслһна керг-үүлдврмүдт бас мөңг йилһҗ өгнә. Әмтн эн җилин чилгч күртл мөңгән авх зөвтә.
2023 җилин эклцәс авн негдсн реестрас һурвн объект һарһгдв. Тиигәд, Элстд Клыковин нертә уульнцд 92 а тойгта болн 9-ч микрорайонд 50-ч тойгта гермүд эдлврт орулгдв. Ленина нертә уульнцд 329-ч тойгта 2-ч корпусин тосхлтд мөңгән орулсн улст саңгин шиидврәр һаруһинь даңцав. Ут тоодан 228 иргнә зөв харсгдв гиҗ сүүрт зәңглгдв.
Таңһчин залврин Ахлач Босхмҗин Гилән темдглсәр, тосхлтд мөңгән орулсн улсин зөв харслһна көдлмш цааранднь күцәгдхмн.


БАТАН Сәәхлә

Видео