Меклгдәд мөңгән геенә

14-10-2023, 09:30 | Общество

Сүл җилмүдт мана орн-нутгт мек-тах һарһдг улс әмтнд җиңнүләд банковск картмудтнь бәәдг мөңгинь эзләд авна. Өдр ирвәс телефоһар меклгдсн улсин тонь өсәд йовна. Эн туст МВД-н көдләчнр кедү дәкҗ зәңгллһнә эв-арһсар чигн, ниигмин сүлҗәнд чигн даңгин саглтн гиҗ бичнә. Тер бийнь әмтн меклгдәд мөңгән геенә.

Хальмг полицин көдләчнр нег һазра улсан даңгин саглулна. Телефоһар таньдго тойгас җиңнүлхлә удандан бичә күүндтн, эдн цуһар мек-тах һарһдг улс болҗ илдкгднә. Зуг олн-әмтн теднд иткәд, полицин зәңгиг учртан авлго мөңгән геенә.
Шидр мана таңһчин улс дәкнәс меклгдв. Дөчн хойрта берд таньдго тойгас күн җиңнүлв. Эн кесгтән телефоһар күүндәд, энүнә толһаһинь эргүләд, кредитн бүрдәцәс 200 миңһн арслң энүнә бәрмт цаасар авгдв. Тер мет Әрәсән төв банкас җиңнүлҗәнә гиҗ келәд, Лагань балһсна бәәрн күүнәс 319 миңһн арслң хулхагдв.
Терүнәс нань Элстд бәәдг һучн һурвта күүкд күүнд үр күүкнәснь 27 миңһн арслң җалв өгтл кергтә гисн зәңг ирв. Тер дарунь гилтә сурсн мөңгиг илгәв, хөөннь үр күүкнь тиим зәңг илгәсн уга гиҗ илдкгдв.
Күндтә нег һазра улс! Ямр чигн тойгудас җиңнүлхлә, таньдго күүнлә удандан күүндхм биш. Кредитн бүрдәцин көдләчнр җиңнүләд, тана бәрмт цаасна тоотынь сурхла бас келхмн биш. Эврән тиигәрән одҗ, цугинь ормднь медҗ болна. Сагар бәәтн, гиҗ таңһчин МВД дәкнәс тодлулҗана.

ОЛЬДАН Цаһан

Видео