ЮРПА-н дарук хург Элстд болх

17-10-2023, 09:00 | Общество

Давсн долан хонгт Әәдрхн балһснд Әрәсән Өмн үзгин парламентск ассоциацин (ЮРПА) XXXIX конференц болв. Терүнд Хальмг Таңһчин Улсин Хуралын (Парламентин) Ахлач Артем Михайлов, энүнә дарукс Байир Путеев болн Николай Нуров, депутатнр Валерий Болдырев, Бадм Салаев, Очр Халгаев, Гаджи Фероян орлцв.

Әрәсән Өмн үзгт болн Ар Кавказд зуульчллһ делгрүллһн уонференцин һол төр болв. ЮФО-д Әрәсән Президентин күцц зөвтә элч Владимир Устинов илгәсн йөрәлин бичгиг энүнә дарук Владимир Гурба олнд умшв. Конференцд орлцачнр ут тоодан тәвн һар төрәр күүндәд, региональн зака үүдәгч органмуд орулсн седвәрмүдиг хәләв. Хальмг делегацин гешүд келн-улс хоорндк хәрлцәнә, бюджетин, алвна, сурһуль-эрдмин, номин, сойлын, аграрн төрмүдин, тосхлтын болн ЖКХ-н комитетмүдин сүүрт орлцҗ, хәләгдсн төрмүдәр ухан-тоолврарн хувалцв. Тер мет конференцин йовудт цергчнрин социальн теткврин, ветеранмудын керг-төрин болн төрскнч сурһмҗин комиссин сүүр болв. Терүнд депутат Очр Халгаев орлцв.
Пленарн сүүрт Астраханск мүҗин Хүүвин Ахлач Игорь Мартынов Хальмг Таңһчин Улсин Хуралын Ахлач Артем Михайловд (зургт) ЮРПА-н туг бәрүлҗ өгв. Дарук XXXX конференц мана таңһчд болхмн.

БАТАН Сәәхлә

Видео