Төрскнч седклтә баһчудыг өскхәр

30-09-2023, 12:26 | Общество

Элстд хулһн сарин 5-ас авн 8 күртл Өмн үзгт болн Ар Кавказд төрскнч седклтә баһчудыг өсклһнә төрт нерәдсн ик хург болхмн. Энүнә тускар «Калмыкия» РИА-н төвд брифинг болв.

Харһлтд Хальмг Таңһчин баһчудын кергүдәр үүлддг Агентствин һардач Камиль Маркеев, таңһчин баһчудын Төвин һардач Санһҗин Эрднь, «Калмыкия» хәәврин багмудын бүрдәцин һардач Халхинә Дмитрий болн «Republic» ООО-н һардач Аслка Иляна орлцв.
Камиль Маркеевин келсәр, ик хургт баһчудын кесг олна бүрдәцсин, ниицәсин нүүрләчнр, волонтермуд орлцҗ чадхмн, Әрәсән кесг регионмудас, тер мет орн-нутгин ханьд шинкән орсн регионмудын болн Беларусин элчнр орлцхмн. Өдгә цагт төрскнч седклин хургт орлцхар 160 һар күн зөвән өгв, гиҗ темдглв.
– Эн җил тиим чинртә хург орн-нутгин регионмудар давулгдв, Элстд давулгдх керг-үүлдвр ашлгч болхмн, тегәд эннь ончта болх зөвтә, гиҗ келх кергтә. Онц темдглхд, эн ик хург «Роспатриотцентр» ФГБУ Хальмг Таңһчин һардврла батлсн бооцана болн «Регион для молодых» нертә төсв күцәлһнә йовудт давулгдҗана. Мана таңһчд бәәдг олн келн-улс цуһар хоорндан ни-негн бәәтхә гисн күсл эн керг-үүлдвр зүүҗәнә, гиҗ Санһҗин Эрднь келв.
Халхинә Дмитрийин темдглсәр, хаврар Пятигорск балһснд ик хургт орлцад, хөөннь тиим керг-үүлдвр мана регионд давулгдх гисн зәңгиг байртаһар тосв эдн. Әрәсән кесг регионас ирх элчнрт төрскнч седклтә баһчудыг өскхин төлә эврәннь көдлмшин тускар келҗ болн теднә дамшлтла таньлдх арһ учрхмн, эннь мадна төлә йир соньн, сән йовдл болхмн гив.
«Republic» ООО-н һардач Аслка Илянан келсәр, төрскнч седклтә улсиг бичкнәснь авн сурһх кергтә, тегәд бичкдүдин билг-медрл делгрүллһнә төвин һардач болсн төләдән эн туст онц оньган тусхаҗ, давулгдх керг-үүлдврт орлцхар эдн шиидв.
Төрскнч седклтә баһчудыг өсклһн, олн келн-улс хоорндан ни-негн, ахнр-дүүнр мет таарлһн, өвкнрин авъяс-заңшалан медлһн – цуг эн тоот керг-үүлдврин һол күслнь болна, гиҗ брифингд орлцачнр темдглсн болдг.

ОЛЬДАН Цаһан

Видео