Таңһчан күцәмҗтәһәр элчлв

30-09-2023, 12:35 | Общество

Орн-нутгт болн мана таңһчд волонтермудын җисән делгрлт авчана. Эдн селәнә болн балһсна өдр-бүрин кесг кергүдт орлцҗ эврә нутгин уралан девшлһнд дөң болна. Хамгин зөргтәнь болн даавртань Донбасст одад, тенд ЛНР-ин болн ДНР-ин селәдәр болн балһсдар хот-хол, нань чигн кергтә тоотыг күнд бәәдлд туссн улст түгәҗ өгәд, зөргтә үүлдвр күцәнә. Тиим әәмшгтә көдлмшиг Хальмг ик сурһулин оютнр бас күцәҗ йовла. Йоста уралһ седклтә көвүд түрү-зүдүлә харһсн әмтнд дөң болҗала. Уленчан Анир үүрмүдтәһән ДНР-ин болн ЛНР-ин һазрт йовхар бас седҗәлә, болв 18 күрәд уга гиһәд энүг тер йовлһнд авсн уга. Болв тиим арһ учрхла Анир эрк биш тиигәрән йовхар шиидв.

Һаха сарин дундурар Сарпулин крайин Пятигорск балһсна медрлин «Машук» төвд Өмн үзгин болн Ар Кавказин округудын 300 волонтер цуглрв. Тер тоод зөргтә хальмг оютн Анир бас эн җисәг өргҗүллһнә халхар шунҗ, түүнә ханьд улм ик то баһчудыг болн арвтнриг орлцуллһна туст күүндвр кев.
Ик хургт «Росмолодежь. Добро» җисәнә элчнр болн хойр округин «Бидн хамцу үүлдҗәнәвидн» гидг нарт-делкән мөрән нүүрләчнр орлцв. Удл уга мана орн-нутгт баһчудын нарт-делкән наадм болхмн, түүнә дамшачнр бас эн ик сүүрин йовудт тоолврарн хувалцв.
- Өмн үзгин болн Ар Кавказин федеральн округудын волонтермудын ик хург-энтн күцәмҗәрн хувалцдг, нег-негән урмдулдг болн ямр нег соньн тоолвр-хәләц тархадг ховр керг-үүлдвр болҗана, – гиҗ орлцач, Хальмг ик сурһулин СПО-н дацңгин оютн Уленчан Анир келв. Түүмр унтраһачин эрдм эн дасчана. – Тиим ик керг-үүлдврт орлцсндан би мана дацңд болн Хальмг ик сурһульд, мини багшнрт болн декан Оксана Николаевна Кониевад ханлтан өргҗәнәв, – гиҗ оютн темдглв.
Эн ик хургт орлцачнр түрүзүдүлә харһсн улст, эврә регионд дөң болхар белн бәәнә. Керг-үүлдврин йовудт төрскнч, буйнч седклтә баһчудын ик хамца тогтав, тернь һол ашнь болҗана. «Күн болһн энд бийдән тааста керг, төсв олҗ авна. Олн баһчуд негдәд чинртә, әмтнд туста керг күцәхлә түүнә туснь кесг холванд өснә. Энд шаңһа болн олна бүрдәцслә яһҗ нөкцлтхин туск сән селвг өгнә, күн болһн тер кергин тускар тоолвран келнә. Тиигҗ аштнь чик шиидвр батлгдна»,– гиҗ Анир темдглв.
Тер мет тоомсрта, күндтә улс ик хургт тоолврарн бас хувалцв. Тер тоод бобслейин марһана нарт-делкән Олимпиадын чемпион, «Юнармийин» түрүн ахлач Дмитрий Труненковин келсн үг Анирт онц тодлгдад таасгдв. Тер мет «Машук» төв энүнд ик туста болв, энд олн зүсн төрәр кергтә медрл авч болҗана, соньн лекцд болн семинарт баһчуд орлцв. Анириг 18 нас зүүснләнь ик хургт йөрәв, эн хамгин баһ наста орлцач болҗ һарв.
Түүнә тоолврар, мана таңһчд волонтермудын җисән ик делгрлт авсн бәәнә, тер дамшлтарн Анир үүрмүдләрн, талдан регионмудын элчнрлә хувалцхар санҗана. Ик хургт чигн эдн эврәннь үүлдврин тускар тодрхаһар келҗ өгәд, талдан регионмудын элчнрин сурврмудт хәрү өгв.
Хальмг Таңһчас онц делегац ик хургт ирв, түүнә ханьд профсоюзин болн олна бүрдәцсин нүүрләчнр, волонтермуд орҗ, уха-тоолврарн хувалцҗ, мана таңһчиг сәәнәр элчлв. Анир ода 3-ч курст сурчана, җил болад СПО-н дацңгиг төгсәһәд цааранднь сурх. Ямаран ик сурһуль шүүҗ авхан ода ухалҗана. Дассн эрдмәрн цааранднь чигн сурч болҗана, талдан чигн соньн олн зүсн эрдм бәәнә. Теднәс негинь Анир шүүҗ авад таңһчдан туста керг дасхар седҗәнә.
СПО-н дацңгин волонтермудын штабин ахлач Уленчан Анирт бидн олна үүлдвртнь, сурһульднь болн бәәдл-җирһлднь күцәмҗ дурдҗанавидн.

ТҮРВӘН Һуна
Зургт: Уленчан Анир (барун таласнь хойрдгчнь) хальмг делегацин ханьд

Видео