Багш болх баһасн

30-09-2023, 12:38 | Общество

Ода мана таңһчин селәдин бәәтхә, балһсна сурһульмудт эсвин, физикин болн нань чигн кичәлин багшнр ховр болҗана. Эн бачм төрин халхар кесг селвлцән, хург болна, болв ода күртл эн төр йостаһар хаһлгдад уга. Яһад гихлә багшин җалвнь ода чигн ик биш, тегәд баһчуд сурһульд ирхәр адһҗахш. Олн жилмүдин туршарт көдлҗәдг багшнр ачта амрлһнд һарна, теднә ормд ирҗ көдлх баһчуд ода уга болҗана.

Тегәд чигн сурһульмудын һардачнр Хальмг ик сурһульд ирәд, мана тал ах курсин оютнриг йовултн, цаг зуур көдлҗәтхә гиҗ сурна. Деер келгдсәр, балһсн, селән гиҗ йилһл уга – альд болв чигн тиим нәрн бәәдл тогтҗана. Хамгин түрүнд эсвин багшнр икәр кергтә болна. Тегәд хальмг ик сурһулин эсвин болн физикин дацңгин багшнр оютнран багшин көдлмшлә өөрхнәр таньлдулх күсл тәвнә.
Түүнә төлә дацңд иртн гиҗ Көтчнрә района Чкаловск дунд сурһулин һардач Баднюш Батаевна Батыровад үрвр кев. Эсвин эрдмәр дасчах 3-4-ч курсмудын оютнрла дамшлтта багш-һардач харһв. Баһ наста багшнриг көдлмшт белдлһнә, тедниг түрүн җилмүдт бүртклһнә болн дөңнлһнә халхар Баднюш Батаевна байн дамшлт хоршасмн.
Түүнә сурһмҗ авсн баһчуд «Багшин дебют» гидг района болн таңһчин марһанд орлцна. Б. Батырован ухалҗ һарһсн зокалыг болн диг-дараг эдн түрүн җилмүдт көдлмштән олзлна. Түүнә ашт Баднюш Батаевнан һардврт бәәсн зәрм баһ наста багшнр эрдмән сәәнәр дасад, өсәд-төлҗәд одна.
Баднюш Батаевна ФМФИТ дацңгин оютнрла таньлдад, тедниг эврәннь сурһульдан дуудв. Эсвин, физикин болн зәңгллһнә кичәлмүдиг эдн давулх. Тиим сурвртаһар кесг һардачнр ирнә. Болв эн харһлт онц чинртә болв. Эврәннь эрдмдән цань уга дурта багш оютнрла тоолврарн хувалцв. «Оютнр бәәтхә, бидн чигн түүнә келсиг ик оньгтаһар соңсвидн, – гиҗ ик сурһулин багшнр келв. –Маднд тиим харһлтс кергтә. Багшин эрдм дасчах оютнр түрүн авгтан сурһульд көдлхәсн әәнә-эмәнә, гиж келх кергтә.
Болв Баднюш Батаевна эврә дурар сурһульд ирлә, багшин көдлмш энүнд таасгдҗана, тер седкләрн сурһулин һардач оютнрла хувалцҗ багшин ик чинрин тускар цәәлһвр өгв. Сурһульмудын һардачнр, дамшлтта багшнр баһчудыг тиим кевәр дөңнхлә оютнрин урмднь өсәд, эдн сән дамшлт-медрл авхнь лавта.
-Тиим харһлтс мана оютнрт ик туста болҗана, сурһулин туск эднә тоолвр сольгдад чигн бәәхмн. Бидн бас сурһульмудын һардачнрт дөң болад, оютнран селәнә болн балһсна сурһуль-эрдмин бүрдәцсәр йовулнавидн, тиигҗ эдн туста дамшлт хоршаҗ авх, зәрмнь үлдәд чигн бәәхмн, – гиҗ дацңгин һардач Елена Сумьянова келв.
Селәнд эс гиҗ балһснд одад көдлх оютнр сурһулян онц зураһар цааранднь сурна. Тиим кевәр вузин һардвр эднд болн бүрдәцст тусан күргхәр седнә. Удл уга эсвин дацңд Элстин олн салврта гимназин болн 3-ч тойгта сурһулин багшнрла харһхар зуралҗана. Ниднәс авн эклсн нөкцлтән эдн тиим кевәр цааранднь күцәхәр седҗәнә.
«Багшнриг бас баһаснь авн өскх кергтә. Оютн болһн багш болшго, болв багшин эрдмд, күүкдт дурта оютнрин то өсәд бәәх гиҗ санҗанавидн», – гиҗ Елена Владимировна тоолврарн хувалцв.
Эн төр ода таңһчин төлә хамгин чинртә төрмүдин негнь мөн. Терүг хаһлхин төлә сурһульмудт педагогин классмуд секгдҗәнә, Хальмг ик сурһульд багшнрин төлә мергҗлт өөдлүллһнә курсмуд көдлҗәнә, тиим кевәр талдан кичәлин багшин эрдмиг күсдундур җилин эргцд дасч болҗана.

ҖААХАН Бадм

Видео