Медәтнриг сәәнәр асрхин төлә

30-09-2023, 12:42 | Общество

Одахн Хальмг Таңһчур медәтнрт болн гемтә-шалтгта улст дөң күрглһнә «Старость в радость» гидг буйнч секдлин саңгин һардач Елизавета Олескина көдлмшин кергәр ирв. Эн саң Әрәсән күч-көлснә министерствлә болн регионмудын күцәгч йосна бүрдәцслә хамдан медәтнриг удан цагт сәәнәр хәләҗ асрлһна керг делгрүллһнә туст шинҗләч болҗ үүлднә.

Күндтә гиич саңгин дөң күрглһнә әңгин һардач Елена Тришинала мана таңһчд медәтнриг болн гемтә-шалтгта улсиг удан цагт сәәнәр хәләҗ асрлһна диг-дара тогталһна төсвин керг-үүлдврмүд күцәлһнә төрәр селвлцә давулв. Терүнд таңһчин социальн харслтын болн теткврин бүрдәцсин һардачнр орлцв. Селвлцәнә ашар социальн бүрдәцсин һардачнрт ах үйин болн эрмдгтә улсиг удан цагт сәәнәр асрлһна халхар болн эднә җирһлин таал ясруллһнд туслх керг-үүлдврмүдин туст сүв-селвг өггдв.
Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина ирсн гиичнрт ханлтан өргҗ, саң мана медәтнрт болн гемтә-шалтгта улст буйнч седклин дөң күргдгинь өөдәнәр үнлв.
Елизавета Олескина болн Елена Тришина хойр Целинн районд бәәршлдг медәтнрин болн гемтә-шалтгта улсин гер-интернатд одад, ямаран таалд энд бәәдгинь хәләв. Социальн бүрдәц «Демографь» гидг келн-улсин төсвин «Ах үйин улс» гидг федеральн төсвин халхар тосхгдсн шин болн өдгә цага бәәрнд бәәршлнә. Тер мет гиичнр Сарпан района әмтнә социальн теткврин төвин медлд «Неотложка» гидг төсвд орлцачд бас одв. Эн төсв «Старость в радость» гидг буйнч седклин саңгин дөңгәр мана таңһчд 2022 җиләс авн күцәгдҗәнә. Елизавета Олескина төсвд орлцачнрин көдлмшиг темдгләд, 2023 җилд эн төсвин медлд мана таңһчд бийән асрҗ чаддго улст өөдән чинртә туслмҗ күргхмн гив.

ЗУРГТ: «Старость в радость» гидг буйнч седклин саңгин һардврла болсн харһлтын кем

Видео