Үнтә белг

30-09-2023, 12:47 | Общество

Шидр Н.Пальмовин нертә Келн-улсин музейд ончта йовдл учрв. Нег һазра күн, төрскн сойлдан хару дизайнер Палана Борис эврән кесн маля белглв. Керг-үүлдврт сойлын көдләчнр, таңһчин нертә үүлдәчнр, музейин мергҗлтнр орлцв.

Палана Борис П.Чонкушовин нертә Элстин билг-эрдмин колледж болн Санкт-Петербург балһсна технологин болн дизайна ик сурһуль төгсәсн болна, кесг җилдән төрскн вуздан багшлв. Өдгә цагт эн Санкт-Петербургд бәәнә, тенд эврәннь мастерской секәд көдлҗәнә, терүнәс нань Art+Design сурһулин һардач болна.
Керг-үүлдврин йовудт билгтә эрдмч алс-зәәһин эв-арһар харһлтд орлцад, эврәннь болн көдлмшиннь тускар тодрхаһар келҗ, белглҗәх маляг яһҗ кесән бас цәәлһв.
– Хамгин түрүнд тиим сәәхн маля мана музейд белглҗәх түүрвәчд ханлтан өргҗәнәв, сүл цагт музейин саң шин соньн тоотар байҗад бәәнә. Палана Борисла таньлдад, цааранднь чигн залһлда бәрхвидн. Белглсн маля музейин үнтә экспонатмудын дунд онц орман эзлхмн, – гиҗ бүрдәцин һардачнь Ирина Мучаева темдглв.
Малян чинрин тускар келхлә, кезәнә хальмг залус нурһлҗдан энүг олзлдг билә, терүнәс нань нилхдән хәрүлхин төлә дүүҗңгин деер энүг өлгдг билә болн күндтә, тоомсрта күүнд маля белглдг бәәҗ.
Үнтә белг бод малын арсар кегдв, терүнд нег таласнь Махакала бурхн, арднь арслңгин толһа, ишднь болхла мөрнә толһа зурата. Тер мет маля кеҗ һарһлһнд 999-ч чинртә цаһан мөңгн, нейзильбер болн хар тосн олзлгдв. Онц темдглхд, белглсн маля Палана Борисин 300-ч көдлмшнь болҗана. Тиим үнтә көдлмшән эрдмч эрк биш күндтә улст белглнә. Тегәд төрскн һазрин музейд эн маляһан белглҗәхнь өсчбоссн һазр-усндан, тууҗдан, сойлдан хару күн болҗахинь эн йовдл дәкнәс ил медүлҗәнә.
Удл уга эн маля Н.Пальмовин Келн-улсин музейин «Степь как жизненное пространство» нертә экспозицд орхмн.

КАРСАНА Евгения
ЗУРГТ: урч Палана Борис сурһульчнрта

Видео