Медәтнрәс дасч авсмн

30-09-2023, 12:56 | Общество

Кезәнәс авн мана өвкнр, аавнр-ээҗнр һартан өөтә улс бәәсмн. Дөрвн зүсн малан асрад, өрк-бүлән теҗәһәд бәәҗ. Малын арсиг, ноосиг олзлад, олн зүсн хувц-хунр, кегдлмүд кедг билә. Эн эрдмд дорас өсч йовх үрдән, ачнр-зеенрән дасхсмн.

Көтчнрә района Алцңһудт бәәдг Босхмҗин Эдуард (зургт) дунд сурһульдан сурч йовсн цагтан нег һазра медәтә залус арсн шилвр кедгинь үзәд, эн эрдм энүг йир соньмсулв. Өдр болһн сурһулин хөөн гүүҗ ирәд, кеҗәх көдлмшинь хәләдг билә. Арсиг эд-бод кенә гидгнь амр көдлмш биш. Эдуардын келсәр, урднь хальмгуд хөөнә арсиг олзлхас урд энүг уснд девтәһәд, дәкәд дарунь идәлдг бәәҗ. Түүнә хөөн арсиг невчк хагсачкад, әңгләд керчәд белддмн. Эртәснь хусад белдсн моднд арсна тасрхасиг торһҗ, хоорнднь сәәхн намчар, эрәһәр бооһад шилвр кедмн. Эн кергиг Босхмҗин Эдуард 6-7-ч классмудт сурч йовсн цагтан дасч авсмн.
Өдгә цагт Эдуард Борисович дүүнртәһән хошт көдлнә. Бичкнәсн авн малын ард йовҗ, хө өсклһнә күнд көдлмш медҗ авла. Эн җил ахнр-дүүнр сән төл авсмн. Эдуардын дүнь Бембә малын эмч болсн төләдән ветеринарн керг-үүлдврмүдиг цаг болзгтнь күцәв. Хөөдин чинәнь сән, бүрнбүтн бәәнә. Эн сармудт Босхомджиевихн үвлин малын хотан белдҗәнә.
Өдрин дуусн хошт көдләд, асхнднь гертән ирҗ, чөлән күртхлә Эдуард Борисович шилвр келһнд цаган тусхана. Энүнә келсәр, өдгә цагт лавкст арсшң өңгтә эд хулдгдна. Эн эдин чинрнь му биш, арснла әдлцнә. Эн арсар кесн шилвр ахр цагин болзгт белн болна, өдрин туршарт нег шилвр кеҗ болна. Тегәд тиим эдәр шилвр бас кенәв, гиҗ Босхмҗин Эдуард келв. Өөрхн үүрмүд, элгн-садн, таньл-үзл Эдуард сән шилвр кедгиг меднә. Элстәс чигн әмтн ирәд, җиңнүләд, шилвр кехиг сурна.
Эдуард Борисович хуучн эмәл бас ясна. Нег һазра малчнр, хөөчнр энүн тал даңгин ирнә. Эвдрсн эмәлинь эн шинәс батрулҗ ясҗ өгнә.
Дамшлтта фермер, билгтә эрдмч Босхмҗин Эдуард дурта аваль, эңкр эцк болн хәәртә аав болна. Мигмр авальтаһан хоюрн һурвн үрән өскәд, хойринь кү кеһәд, эндр дурта ач-зеенрән теврәд амрадҗирһәд бәәнә. Амрлһна болн байрин өдрмүдлә Элстәс ачнр-зеенрнь ирҗ, аав-ээҗтәһән цаган сергмҗтәһәр давулхдан йир дурта. Аавнь ач-зеенрән мотоциклд суулһад, хошт күрәд, хөөдән үзүлнә. Алцңһуд хотндан Босхомджиевихнә өрк-бүл тоомсрта, ни-негн өрк-бүлд тоолгддг. Цаг давад, Эдуард Борисовичин ачнь болну, зень болну, аавиннь үлгүрәр арсар олн зүсн кегдлмүд кеһәд чигн бәәхнь маһд уга, гиҗ сангдна.

БАДМИН Занда

Видео