Демч ламиг йөрәв

19-10-2023, 09:00 | Общество

Шидр Хальмг Таңһчин Толһач Хаска Бату төв хурлын демч лам Йонтен гелңгиг геше ик цол харсснла йөрәв.

Дрепунг Гоманг хурлд сурч, шүүврән сәәнәр өгч ик күндтә цол эн зүүсн болдг.
– Байрта йовдл хальмг литәр хулһн сарин 1-д учрв, тегәд эннь таңһчин шар шаҗна тууҗд орхнь лавта. Энткгин Дрепунг Гоманг хурлын лам Кхен-Ринпоче геше-лхарамбо Джигме Гьяцод мана ламнр тенд сурһуль сурдг арһта бәәсиг Хаска Бату темдглҗ ханлтан өргв.
Урднь хальмг ламнр түрүләд Төвдт йовҗ, хөөннь Энткгт мел эн хурлд сурһулян төгсәдг билә. Хальмг Таңһчин шаҗна шин тууҗд Йонтен гелң иим күндтә ик цол харссн хойрдгч күн болна. Түрүләд энүг таңһчин Шаҗн лам геше Тендзин Чойдак харссн мөн.
Урднь хүвсхлин өмн хальмг шар шаҗна тууҗиг делгрүлҗ йовсн геше Лобсан Тепкин, геше Гава Сеперов, геше Вангъял, Тугмд-гавджи болн талдан үүлдәчнрин кергиг эдн цааранднь күцәхмн.
Геше Йонтен гелңгиг болн шар шаҗнд шүтдг нег һазра улсиг байрта йовдлла йөрәҗ, цугтаднь эрүл-менд болн цаһан хаалһ дурдҗанав, гиҗ Бату Сергеевич темдглв.

ОЛЬДАН Цаһан

Видео