Малчнр үвлд эртәснь белдҗәнә

19-10-2023, 09:25 | Общество

Удл уга малчнрин төлә 2023-2024-ч җилмүдин дааврта үвлзллһнә кем эклхмн. Энүг сән аштаһар давулхар таңһчин фермермүд малын теҗәлән эртәснь белдҗәнә. Эдн малын хашахаацан ясад үвлд дааврта кевәр белдврин көдлмшән күцәҗ йовна.

Хальмгин селәнә эдл-ахун министерствин зәңглсәр, таңһчин эдл-ахуст 413,8 миңһн тонн малын хот керглгдҗәнә. Үлдсн хот учртан авхла, шидр кесн то-дигәр 399,1 миңһн тонн тогтана.
Тиим кевәр фермермүд 96,5 процентд үвлин теҗәлән белдв. Урдк җиллә дүңцүлхлә малын керглгдҗәдг хот невчкн баһрв, гиҗ келх кергтә. Келхәс, үвлзлһнд сәәнәр белдсн эдл-ахус дунд Октябрьск района «50 лет Октября» АО, Хар Һазра района Б.Б.Городовиковин нертә болн С.М.Буденна нертә хойр МУП нүүрләчнрин тоод йовна.
Немхәс, эн җил таңһчин селәнә эдл-ахун көдләчнр дәкнәс хамгин элвг урһц хураһад ончрсн билә.
Җил болһн малчнр олн зүсн көтлврмүдт орлцҗ, шаңһас мөрә авна, эннь кергән делгрүллһнд эрк биш тусан күргнә. Тер мет Хальмг Таңһчин Толһач Хаска Бату селәнә эдл-ахун көдләчнрин үүлдврт онц оньган тусхаҗ цуг таласнь дөңннә. Үвлд икәр эс киитрхлә намрар тәрсн тәрәһәс ирх җилд буудян урһц элвгәр авгдх гисн иткл бәәнә.

КАРСАНА Евгения

Видео