Эв-дован үзүлв

19-10-2023, 09:35 | Общество

Давсн амрлһна өдрмүдт Элстд Хальмг Таңһчд МФЦ бүрдәгдснә10 җилин өөнд нерәдгдсн спартакиад болв. Спортивн марһанд МФЦ-н, СФР-ин, Росреестрин, Роскадастрин болн таңһчин цифрин делгрлтин министерствин багмуд эв-дован үзүлв.

Марһан «Ойрат-арена» спортивн комплекст болн Н.Калдариковин нертә спортын бәәшңд болв. Команд болһн келн-улсин болн авъяст тохрсн спортивн марһаст орлцв. Тиигәд, эдн ширә деер нааддг теннисар, волейболар, армрестлингин, дартсин марһаст дөрлдсн деерән саадгар халһна, нәрн шинҗин, шаха хайлһна марһаст төв хадг, эвтә, олмһа улсиг йилһҗ авв.
Әрәсән социальн саңгин команд аштнь зурһан марһанд диилвр бәрәд, нүүрт һарв. Эдн волейболар, армрестлингар, канат татлһна, саадга халһна, нәрн шинҗин, ширә деер теннис нааддг марһанд цугтаһаснь ончрв. Роскадастрин команд цаһан мөңгн медаль шүүв, Росреестрин команд 3-ч орм эзлв.
СФР-ин Хальмг Таңһчар үүлддг әңгин һардач Чингиз Ивановин келсәр, иим керг-үүлдврмүд әмтиг хамцулҗ, улм ик күцәмҗ бәрҗ диилвр бәрхин төлә зүткхд урмд өгнә. Социальн саңгин әңгин көдләчнр чик авг-бәрцәр бәәҗ, спортар соньмсҗ цогц-махмудан батрулдгиг һардач темдглв.

Мана зәңгч

Видео