Цергчин нертә уульнц

19-10-2023, 10:05 | Общество

Целинн районд СВО-д зөргәрн ончрсн цергчнрин санлд нерәдсн керг-үүлдвр болв. Энд Интернациональн уульнцин нернь сольгдад, СВО-н Баатр, дәәч Артур Базыровин нерн зүүлһгдв. Терүгинь иткүлсн самбр уульнцин эклцд углҗ тәвгдв.

Давсн җилин хулһн сард Артур Базыров Николаев балһсна өөр болсн дәәлдәнд әмнәсн хаһцсмн. Артур Бембеевич Базыров Хальмгт 1987 җилин июлин 29-д төрсмн. Цергч-интернационалист Бембя Лагаевич Базыровин болн багш Татьяна Владимировна Коксадаеван өрк-бүлд төрсн көвүн эцкин үлгүрәр төрскән харсв. Г. Жуковин нертә Троицк дундын сурһуль төгсәһәд, Артур 6-ч тойгта Элстин профессиональн лицей төгсәһәд, автомеханикин эрдмтә болсмн. Көдлн бәәҗ, сурһуль сурад, Артур Хальмг госуниверситетин спортивн факультет төгсәв. Цергт мордад, церглҗәсн кемд Грузин һазрт дәәлдән болад, тер дәәг ууруллһар кегдсн цергә үүлдврлә ирлцәд, баһ наста цергч терүнд орлцх зөвтә болв. Тернь 2005 – 2007 җилмүд бәәсмн.
Тиигәд зөргтә хальмг көвүнә җирһлин хаалһнь Әрәсән Федерацин Зертә -зевтә чидлмүдлә залһлдата болв. 2008 җиләс авн 2014 җил күртл Артур Волгоградск областин Камышин балһснд контрактар церглҗ йовла. 2015 җилд Артур Базыров контрактан цааранднь давулсмн. Тиигәд Украина һазрт дәәнә үүлдвр эклсн цагас авн Артур тенд церглҗәсмн.

УШКАНА Сувсн

Видео