Бичкдүдтә өрк-бүлмүдиг дөңнҗәнә

21-10-2023, 09:05 | Общество

Шидр Хальмг Таңһчин Улсин Хуралын (Парламентин) Ахлачин дарук Нуура Николай болн таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина Әрәсән орннутгин Хүүвин сүүрин медлд болсн «залврин цаг» сүүрт орлцв. ВКС-ин эв-арһар болсн селвлцәнд Әрәсән залврин Ахлачин дарук Татьяна Голикова мана орн-нутгт бичкдүдтә өрк-бүлмүдин бәәдлин туск илдкл кев.

Вице-премьерин темдглсәр, бичкдүдиг дөңнлһнә төрт шаңһас йилһгдҗәх мөңгнә кемҗән икдв, баһ тетквртә өрк-бүлмүдт асргдҗадг бичкдүдин болн нилхд хорлһна то баһрв. Өрк-бүлмүдин олз-ору икдүллһнд Әрәсән Президентин даалһврар батлгдсн демин мөңгн туслв, тиигәд 10 сай бичкн болн 345 миңһн саата күүкд күн терүг авдг болв. Эн җилин эклцәс авн шин регионмудын 245 миңһн күүкн-көвүн болн 5,6 миңһн саата күүкд күн бас демин мөңг авчана. Социальн бооца батллһна болн экин сертификатын көтлврмүд баһ тетквртә өрк-бүлмүдин то баһруллһнд дөң болв. 2022 җилд мана орн-нутгт 912 миңһн экин сертификат өрк-бүлмүдт өггдв. Өрк-бүлмүд терүг олзлҗ, гер-бүүрин таал ясрулна, күүкдиннь сурһульд олзлна, экин пенсьт орулна. Экин сертификатыг олзлад, эдн 1,3 сай арслң олзта-тустаһар олзлв. Тер мет шишлң цергә керг-үүлдврт орлцачнрин үрдиг бичкдүдин садт, дунд болн ик сурһульд чеерүд угаһар авлһна, эмнлһнә төвд эрүл-мендән батруллһна путевксар тетклһнә төрмүд закадт батлгдснь эн төр хаһллһнд туслв гиҗ вице-премьер заав.
Сүүрин йовудт Әрәсән орн-нутгин Хүүвин өрк-бүлин, күүкд улсин болн бичкдүдин, социальн политикин болн ветернамудын керг-төрин комитетмүдин элчнр хәләгдсн төрәр бас илдкл кев.

ДООҖАН Наталья

Видео