«Әрәсә» гидг һәәхүлд белдвр кеҗәнә

21-10-2023, 09:25 | Общество

Үкр сарин 4-д Москва балһснд ВДНХ-д «Әрәсә» гидг һәәхүл-хург болхмн. Терүнд мана орн-нутгин 89 субъект, тер тоод Хальмг Таңһч орлцхмн. Мана таңһч сүл җилмүдин күцәмҗин болн өөрхн иргчдән кехкүцәх көдлмшин тускар хувалцх. Тер мет һәәхүлд орлцачнр хальмг улсин авъясмудла, сойлла таньлдҗ, шимтә болн сенр хот амсҗ, теегин сәәхн йиртмҗин бәәдлиг һәәхч чадхмн.

Шидр Хальмг Таңһчин залврин Ахлач Босхмҗин Гилән һәәхүлд белдвр келһнә төрәр селвлцә давулв. Һәәхүл олн-әмтнә ниицлтин Өдрлә секгдхмн, тегәд мана орн-нутгт бәәдг олн келн-улс терүнд орлцҗахнь темдгтә йовдл болхмн. Мана зурачнр, артистнр, спортсменмүд, урчнр болн арһлачнр хальмг улсин Зул болн Цаһан Сар байрин өдрмүдин тускар сергҗмтә нәр-наад үзүлҗ, зургуд, һарин эрдмин кегдлмүд олна оньгт тусхахмн. Бар сарин 12-т Әрәсән Һол закана 30 җилин өөн темдглхмн, дигтә эн өдр «Әрәсә» гидг һәәхүл-форумд Хальмг Таңһчин өдр болхмн.
Һәәхүл өрәл җилдән үүлдхмн, терүнд федеральн министерствс, ведомствс, корпорацс, олна бүрдәцс орлцх. Һәәхүл-форум нөкцлт, сойлын болн экономическ залһлда батруллһна талвң болхмн. Энүнд мана Әрәсәд бәәдг олн келн-улс эврәннь өвәрцән, күчән, сойлын байн зөөрән үзүлҗ, орн-нутгин улсин тууҗлгч ниицлтиг медүлхмн.

Мана зәңгч

Видео